طعم الحنين
طب كنت سيبني أكمّل العناوين
وأشرح لها طعم الحنين تاني
لسّه العيون الحلم مش فاهمين
وأنا لسّه زي ما كنت وحداني
................................
أنا اللي كنت الحلم ف البدايات
وكنت شبّاكك على بُكره
ازاي مَنعتي القلب م الدقات
وازاي حرمتي الفكر م الذكرى
إزاي أشوفك من بعيد لبعيد
وإزاي أسيبك وإنتي وخداني؟؟
...............................
يا أم الهوى أعجب من الأعاجيب
من إمتى بس عنيكي عرفوني؟
مطرح ما ترمي السهم فيا يصيب
وانا كنت مطرح ما انتي بتكوني
إزاي أشوفك من بعيد لبعيد
وإزاي أسيبك وإنتي وخداني؟؟
..................................
أنا لسّه نفس الأهه و الموال
كل الغُنا في عنيكي ما بيكفيش
وانتي السؤال اللي جوابه سؤال
وانتي الدليل إن الحياه بتعيش
إزاي أشوفك من بعيد لبعيد
وإزاي أسيبك وإنتي وخداني؟؟
...............................
