جانا العيد *

جانا العيد أهو جانا العيد
فرحه وبسمه وقلب سعيد
كل الكون متغير حاله
فرحان لابس لبس جديد

سامع الفرح يدق الباب
جايب الصحبه والأحباب
قوموا نهنى كل العيله
قوموا معايا بنات وشباب

يا لا نعيد على أهلينا
نفرح بيهم يفرحوا بينا
نبنى ما بينا جسورالفرحه
أصل الفرحه دى غاليه علينا

آدى عريس مستنى الزفه
وأدى أَمور لساه ف اللفه
ويا طيور السما فرحانه
نفسها تاخد ف الكون لفه

بكره المُوزه هتقعد جنبى
اللى عشقها وحبها قلبى
بكره هيبقى العيد اتنين
بكره هفرح كل حبايبى

آدى الفرحه ساكنه قلوبنا
بكره هننسى كل عيوبنا
وهنتسامح ....وهنتصالح
بكره هنمحى كل ذنوبنا

بكره هبوس إيد أمى وأبويا
وأحضن أختى كمان وأخويا
بكره الفرح يلون بيتنا
مش بالفرشه ولا بالبويا

بكره سعاده مش على حد
طالبه هزار مش طالبه الجد
انسى الدنيا وعيش أيامك
بكره هتبقى أب وجَد

بكره هندعى رب العزه
ينصر مصر وينصر غزه
بكره نعيد على بنغازى
بكره وطنا ينول العزه

كلمات / رضا أبو الغيط