يعنى ايه سوارية يساوى عرى .... ايه الفرق ؟ ليه اللى بتلبس مكشوف قوى بالليل .. بتستحى انها تلبس مكشوف قوى الصبح ؟ 
و ليه ما بتحطش مكياج الصبح فى الصيام ؟ ثم لو مافيش صيام تحط مكياج؟
و ليه تحطى ايات و احاديث و كلام دينى و صورتك على الفيس ماده فيها الأبواز (جمع بوز) ....؟
ايه حالات التناقض ديه ....
و يعنى ايه راجل ماشي جنب مراته و هى لابسه الجينز مقطع ..فوق و تحت ؟ ايه يا راجل؟ مافيش كرامة و لا رجولة و لا أى احاسيس بانك راجل ؟ ...و هكذا مع بناتك اللى ملبسهم شورت و لا مكشوف من فوق ....أصلنا فى البحر بقى ؟ ايه الفرق ؟ ما هو اللى بص فى البحر ..هوا نفس الشخص اللى بيبص خارج نطاق البحر ؟
الرد:" المفروض ان الناس ما تبصش 
الرد الثانى : طيب و ليه هى لابسة شورت و موضه و توب مكشوف ؟ علشان تتفرج هى على نفسها يعنى و لا ايه؟؟
ما هو لو هى بتلبس عريان علشان نفسها ...ما تلبسه فى الشارع كمان؟ بتتكسف ليه ؟
تناقض...
مكياج تقيل مرعب للعروسة ..بتتحول فيه إلى غول مشوه ..تشيل حواجبها و تحط شرطة حمراء .... تشوية متعمد ,,, و متخيله كده ان الجمال كله ليلة الفرح ...
و نقلع الحجاب بقى ...ما هى ليلة العمر ....
و هاتك يا رقص بلدى ..... بلدى؟؟ الرقص ده يا جماعة مالهوش دعوة ببلدى خالص .....خالص ...
و نجيب رقاصة عريانة تقعد تتنطط زى المسخ و العاهرات أمام الناس و امام جوزك .., انتى فرحانه و بتصقفى كمان .., بعد الفرح و الرقص ....بيوم .. تخربى بيتة لو بص على واحدة ,,, اذا كنتى انتى بايدك جايباله الرقاصة العريانة ....و قدام الدنيا كلها ...
نبدأ الفرح يا جماعة بأسماء الله الحسنى ..., بعدين هاتك يا رقص و مسخرة ,,,,,
تناقض عجيب ...
أه .. اللى جاى قد اللى رايح 
أنا : أيوه يا عم ,,, بس علبة السجاير اللى انت حاططها قدامك ديه .. بتعمل ايه ... طالما اللى جاى قد اللى رايح ؟؟؟؟؟؟؟
تناقض مريب 
قاعد مع مراتك و لا مش عارف مين ...و حاطة الشيشة فى بوقها فى القهوة اللى هى أصلا كرسي على الرصيف........
ايه مافيش احساس ...خالص ...بانك راجل ......
راكبة جمبيك مراتك فى العربية .., لابسه مكشوف ..و العربيات اللى جمبك بتبص و تبحلق ...ايه ..انت مش مضايق و لا حاجة ..... الفاترينة اللى جانبك ديه لامة دبان عليها ...ما تهش الدبان ..أو اخلص من الفاترينة .....أو أحلى و أحلى .... نظف فاترينتك ...
أيوه 
نظف فاترينتك ....
بسام الشماع ّّّّّّ