المصدر: بسم الله الرحمن الرحيم الشباب المكرمين السلام عليكم ولرحمة الله وبركاته الظاهر الكرسي بدون مخدة : المكان امدوينه .بيت ست البنات بت موسى,الزمان الساعة ستة ونص مساء الجمعة 1985م _هرج ومرج نسوان داخلات ونسوان مارقات أجروا نادوا مدينهالسيده بت على عندها وجع بطن وحضرت مدينه دخلت الأوضة خرجت واحدة من النسوان سخنت موية دخلت أخرى بالمويه سمعن صرخت السيده الصرخة التانية صرخت طفل أصر أن يخرج في هذا اليوم بمشيئة الله سبحانه وتعالى وأطلق أول صرخة في سماء ام دوينه الطيبة ..وهناك أصوات حمد الله على السلامة مبروك الوليد ..التمر ولاشى غير التمر والزغاريد ..تفرقت النسوة ونام الطفل في حضن امه آمنة.أصبح الصبح ..ومضت سبعة أيام ,احضر احمد بابكر خروف السماية ومعاه قفة خضرة وقرعتين صفر كبار ذبح الخروف الله أكبر سميناه (ابو الحسن ) قطع اللحم والمرارة ووزعت للجيران كيمان كيمان ونزلو حلتي الملاح القرع والخضرة وأكل الجميع وحمدوا الله بقدوم المولود البكر ...ريحة الحرجل والحلبة والبربور والطفل يرضع من ثديالسيده بت على لبن صافي أبيض طيب طيبة أمه وطيبت أهلام ام دوينه الطيبين وكرم ناس الحلة كبار وصغار ..مضت الأيام والسنين والطفل من سبعة يوم الى ستة سنة أشتروا ليه حذاء من باتا وقتها يسمونه (الشدة وهو نوع من الأحذية البلاستيكية أبيض اللون) وجلابية بيضاء اللون زي لون لبن غنمايتنا الزرقاء أم قرناً طويل وخيطوا ليه شنطة دمورية لي كراسات وكتب المدرسة وفرحبابكر ومانام باليل منتظر الواضة بتين تصبح عشان أمشى المدرسة ودخل مدرسةام دوينه الصغرى وجاء الأول وفرحت امه وادته تعريفة أشترى بيها حلاوه طحنية وجات اجاوة الخريف وبدات الزراعة وبابكر شال كورته مع الأولاد ومشى يتيرب الانقاية بي سبعة قروش واتهى موسم الزراعة بابكر وفر جنيه وجاء المولدفرحان فات المولد أشترى حصان وحلاوه مولد قدام الحلةالمطرة سيحت الحصان في اليوم التاني مشى مولدجاب موتر وحصان وبعد يومين اكل الحصان والموتر وفتحت المدرسة اجازة وكملت وجاء الامتحان وبابكر نجح وقبلو في مدرسة احمد يوسف علقم الرأسين ...داخلية أولاد من كل القرى المجاورة ...أشترو ليه شنطة حديد وجلابيتين وحذاء باتا أبيض زي لون طباشير مدرسة ام دوينه والشنطة لونها زي الظهرة الفي دكان عمر ابراهيم وفي واجهة الشنطة رسمت وردتين بالالوان أزرق وأخضر وواحد زي اون المنقة والدخلية القراية وليالي السمر والرياضة وجر الحبل والجمباز وحاجات كتيرة والكسرة بي ملاح الويكة ومرة بالعدس وانتهت السنين وجاء الامتحان والممتحنين أكثر من 800 تلميذ يتنافسون في 80 كرسي وكانت النتيجة وجيت ( الطيش ال80) بكيت ثم فرحت وكانت فترةجميلة. ( بابكش)