خواجه

خواجه فلس غش ودلس 
باع حتي رفوف الدكان 
بص وفكر مره كويس 
انا ليه ما احفظشي القران 
بكره راح انقل لبلد تانيه
واروح المسجد كل ادان 
ربي الدقن ولبس طرحه 
غير اسمه وبقي رمضان 
ولبس ساعته في ايده التانيه 
تبقي يمينه علي طول ها تبان 
فصل جوز جلاليب قصرهم 
لازم تحت الركبه يبان 
عاوز برضه يكمل دينه 
قام واتجوز جوز نسوان 
جاب كتابين في الفقه قراهم 
وبقي الداعي في اي مكان 
بص صليبه لسه في ايده 
شاله بمية نار حرقان 
وبدأ يدي دروس ويحاضر 
وحلقه يفسر فيها قران 
مره في مره طلع المنبر 
خطب الخطبه بعد ادان 
سالت وسط الخطبه دموعه 
بلت دقن الشيخ رمضان 
لم الناس حواليه بشطاره 
مطرح ما يروح تلقي طوفان 
حليت يا ما اللعبه في عينه
فصل جبه معاها قفطان 
لبس العمه وشد في شالها 
قالها في نفسه الناس عميان 
كل برامج الدين تلاقيه 
وشاشات عرضه في كل مكان 
بقي مشغول علي طول ياحرام 
وحساب بنكه بقي مليان 
رشح نفسه وصار النايب 
عاش في هناوه مع الغزلان 
ومرض فجأه وراحوا يزروه 
يلقوا في بيته جوز صلبان