فى 22 أكتوبر 2014 رسمت الشاعرة الرائعة زينات القليوبى بحروفها الناطقة شعرا عاميا من واقع الحياة لشاب يحاول أخذ والدته من بيتها الذى قضت فيه عمرها لتقيم معه فى شقته مع زوجته واولاده وهى ترفض بضعف الأمومة مغادرة البيت الذى قضت فيه سنوات عمرها..وقد تأثرت جدا بالقصيدة واسلوب الشاعرة الذىياخذ القلوب فترجمت إحساسى وكتبت الآتى
## ياه ع الوجع ##

ياه ع الوجع
إخص عليك
يادى الجدع
فعلا خلاص
إحنا بقينا
فى زمن البدع
والله عليكى يا خالة
حالك ولا اجدع رجالة
ياسلام على وشك الصامد
وقلبك الجامد
ونظرك البعيد
وجه جاى من قلب الصعيد
بيتحدى السنين
خلى ياخالة فى ودنك الحلق
و..وحياة اللى خلق
إوعى تنحنى للزمن
وخليكي زى ما انتى
لابسه توب العفاف
ولقمتك..ملح بدقة
ورغيف عيش حاف
وغطاكى بطانية قديمة
وحتت لحاف
إوعى تبيعى الحلق
ورغم انف الزمن
لأن الحلق آخرته
إنه..
تمن الكفن
بقلمى /فؤاد الشيه