يا بنت الإيه...يا جنّية
يا عايشة ف قلبي وعنيا
وماشية الليل على رموشي
أبوس إيدك واقول حوشي
رموش عينك بتقتلني
نغم صوتك بيسحرني
يحوّلني
يا دوووب تمثال
لكن حاسس بشوق عينك
لكن شايف حروف اسمي
يدق القلب ينقشها
حروف من نار
على جبينك
ويجي الليل ويفرشها
على سريرك
ويفرشني على سريري
وتجري مُهرة ف شراييني
وأجري حصان ف شرايينك
ولما ايديكي تلمسني
يدوب شمعي
وتتلخبط
حروف اسمك على دمعي

واحسّك نسمة تتسرسب
ف موالي
ونا العطشان ف بير عشقك
نازل بشرب مواويلك
أمد الإيد تبوس خدك
بحبك
طالعة من قلبي
ونا حابب
يدغدغ قلبي نور ردك
واستنى 
حقيقي إحنا ف الجنة!!
عيون قلبي ف محرابك
بتتحنّى
وعصفورتين
وعود ياسمين ف شباكك
وتتشابك
خيوط شعرك مع شعري
ومن تاني...يدوب شمعي
وتتلخبط 
حروف اسمك مع دمعي
ونتسرسب أنا وانتي
ف حضن الشوق ندوب تاني
ويجي الليل ويجمعنا
ونا وانتي نقول ...تاني
يقرّب بينا ..يجمعنا
يفرّقنا..يلملمنا
يبارك فرحة ف عيوننا
ونا وانتي نقول ...تاني
ويجي الصبح
أمد الإيد بشوق ليكي
مالاقيكي
وألاقي الشمس تحضنني
آتاريكي
يا بنت الإيه ف شراييني
وجوه القلب والنني
بحبك
طالعة من قلبي .