هنا زهقان - هنا طفشان - هنا مخنوق و متضايق
و ياما كتير بيبتسموا لكن البال مش رايق
و ع الناصيه شباب تايهين بتستنى الأمل مره
بإن الدنيا تتعدل و تخلق م الظلام بكره
و ع الناصيه بنات قمرات و كل احلامها تتستر
بتقضى الليل مع الحسرات عشان القطر متأخر
و تشكى همومها للخلاق عشان الرزق متقطر
و ع الناصيه تشوف أطفال على اللقمه بتتنازع
بتشكى لربنا الأحوال عشان مرميه فى الشارع
عشان الأم ملهيه و فقر الأب مش نافع
و حوجة إيد تهد جبال عشان الحظ مش طالع
و فجأه القطر شرفنا ... لكن سواقه كان أعمى
سرق أحلامنا .. غرقنا .. بحنيه و أيديه ناعمه
و كان دايما بيوعدنا يوصلنا لمحطة مصر
ياخد أحلامنا و بإيدنا يسكننا معاه القصر
لقينا نفسنا بعدنا عن السكه و ضاع العمر
يا ميت حسره على الأيام و ع الأحلام و طول الصبر
يا ميت حسره على بكره و أيامنا اللى مش بتمر
يا قطر كبير و تهنا معاه ...
يا حلم كبير و ضيعناه ...
هنفضل عمرنا نحلم
بقطر غلابه يجمعنا ...
يوصلنا لمحطة مصر
--------------
رءوف حجر
أعجبنيأعجبنيأحببتههاهاهاواااوأحزننيأغضبنيتعليق
