( إوصفلي شعورك )

لو تعبت خطاويك ع السكة
لو تاهت حيرتك وظنونك
لو حواليك الدنيا بحالها
وانت وحيد عايش بهمومك
أنا زيك عشت شعورك

ف ارسم على خدك وردة
لونها بألوان الطيف
وسيبها تداعب خد النسمة
ف البرد أو ليلة صيف
وساعتها اوصفلي شعورك

طب طلع من قلبك ضحكة
ترسم على وشك نورك
هاتدوب دمعة حزنك
قدام فرحك وسرورك
وساعتها اوصفلي شعورك

إرمي حمولك على بكرة
وقول الكلمة اللي تزينك
وازرع من أحلامك فكرة
هاتشوفها بتطرح خيرك
وساعتها اوصفلي شعورك

أنا أصلي مجرب ميت مرة
وشعوري أنا باوصفهولك
قوم عيش الأيام الحلوة
سامح واتخطى ظنونك
وساعتها إوصفلي شعورك

إوصفلي شعورك
~~~~~~~~~~~~~
بقلمي ..
معوض حلمي
منشأة بطاش
تمي الأمديد
دقهلية