دستور ياسيادنا
دستور ياخوانا فى نص الليل
خير اللهم اجعله خير
شوفنا بعينا أمل كداب
ومشينا وراه يوصلنا لباب
وخلف الباب فيه أرض تراب
وسما مليانه غيوم وضباب
ولمبة جاز فى ازازها هباب
ايدها فى مسمار على باب سرداب
جوه السرداب فيه غول بنياب
وماسك فى اديه خرجين وجراب
خرج خراب مع خرج سراب
وكتاب فى جراب مع كشف حساب
دستور ياسيادنا من ده كتاب
كل بنوده عذاب فى عذاب
البند الأول...هس سكوت
البند التانى...هتفوت هتموت
البند التالت...عيش بشروط
البند الرابع...افقس كتكوت
والخ الخ وجخ فى جخ
وكل كلامنا عيب كده كخ
ماهى لعبة نرد جوز مع فرد
فيها ناس فايزه وناس فى الأرض
غيتونا ياحباب تهنا فى سرداب
أملنا آهو خاب والغول ع الباب
بقلم طارق السيد

تعليق