خاص بمسابقة شهر أكتوبر
الشاعر / رءوف حجر
الإسم / عبدالرءوف محمد عبدالله
الدوله / جمهورية مصر العربيه
------------------------------------
يعنى أيه كلمة وطن
الوطن مش بس أرضك و للا عرضك أو حدودك
الوطن دا يبقى دينك يبقى فرضك فيه وجودك
يبقى ريحه لسه باقيه من جدودك
سر ساكن فى الأماكن شد عودك
وعد منك إن روحك تفتديها طول وجودك
يبقى لفة شعر بنتك و الضفاير
يبقى بسمه من حبيبتك فجأه تلقى القلب طاير
يعنى ضمه ف حضن أمك يوم تضمك
يوم ما تبكى لأمر همك
يعنى وجعك - يعنى ألمك
يعنى جيشك - يعنى علمك
يعنى ضمة إيد قويه من زمايلك فى السريه
و انت دمك لسه نازل بعد ضربه إرهابيه
شق صوتك صوت سكوتك تنده الندهه القويه
أفتديكى بنور عينيا و عيشى حره يا بهيه
و للا صرخه بعد آهه و فجأه تيجى الروح وراها
و الملايكه تزف روحك تلقى جنه و ١٠٠ حوريه
لما يبقى الموت سبيلك يا الشهاده يا الكفاح
لحظه و تودع زميلك فى السلاح
لما تلقى دمه سايل دمه نازل فوق هدومك
يبقى تاره نار و قايده ف عز نومك
لما تبقى جوا عينك ...
فى الحبيبه و القريبه و الطبيبه و السكن
لما يبقى كل حلمك فيها جسمك يندفن
هتلاقيها ...
هتلاقيها سر باقى ف كل عصر
سر ينطق كلمه واحده هيا مصر
يللى ما تعرفشى إعرف ...
يبقى أيه معنى الوطن
الوطن ده ....
يبقى مصر
هوا ده معنى الوطن
-------------
رءوف حجر
أعجبني
