ارسم دايره وشَخْبط فيها
واحبس فيها آلام الدنيا
هاتلك قِفْل وسيبه عليها
واقطع يد الضحكه الجانيه
اللي ب تضحك وقت الفَرْح
لجل السخريه وإحباط
متفقالك ويَّا الجَرْح
وانت كمان اعمل خَطَّاط
قلمك ياابني ف ايدك أولى
يكتب كل اللي جوَّاك
أصل الآهة عامله مداوله
والهم الْ فرحان ف بُكَاك
خَلِّي الريشه ب قلب جَرِيء
تشرب دايماً من ألوانك
قول للدمعه انا بريء
بَعْتر ع الدنيا احزانك
واقفل اوضه جوه الدايره
عَبِّي الحزن والتابعين
له علشان الفرحه دي طايره
بس طريقها مش عارفين
رايح الامل يدَوَّر حَبَه
خَبَّط ع الدايره المرسومه
مفتاحه و.ف قلبك خَبَّى
وكام اغنيه جميله ل ثومه
تَمَلِي الأمل كان سَمٍّيع
على احبابه ولا يتغطرش
عالي مزاجه قلبه يسيع
لحن وكل أغاني الأطرش
مره يبكي بس عشان
يديك درس ف الإصرار
يمَوِّت فيك كل جبان
غاوي يعيش ف الدايره حمار
اعزف لحن الضحكه ف دمعَه
قَلْب الدايره لو كان طافي
هات م طموحك نَوَّر شمعَه
تلقى الصوره جمالها كافي
وارسم فرحه ف قلب الهم
لَوِّنْها باللون الأبيض
لَمَّا يشوفها يروح يتلم
وِزِف الحلم الغايب عَوَّض
كل اللحظه الْ فاتت منك
ولا أخَدِتْشي نصيبها افراح
ضَحَّك قلبك يضحك سِنَّك
تلقى الحزن منك راح
ف ساحة الدايره دُق الطَبله
قلمك صاحبك والشخابيط
تخنق أم الدنيا الهَبله
اعمل لِ التكشيره عبيط
حتى لو جات سألت عنك
غَنِّي ولاغي الضحكه وظَبَّط
ترقص هي كمان على فَنَّك
ييجي الأمل وتلقاه خَبَّط