جواب شهيد
========
إهداء الي شهداء الوطن اكتوبر 1973
..................................................................

أمي الغالية ليكي تحية
ببعتهالك أنا من سينا
دا حنا عبرنا الناحية التانية
شوفنا ملايكة من حوالينا
فاكره حسين ومحمد يا اما
بعتين ليكي أغلي سلام
أصل عيونهم فرحت لما
حقنناأغلي الأحلام
لما نوين اكتب ف جوابي
حرف بحرف كتبته بدمي
روحي وقولي لكل احبابي
أنا خدت التار ده لخالي و عمي
واحكي القصة للاولاد
محسن وجهاد
وقيلهم ابوكو ده ضحي عشان
يبني الامجاد
وتعيشوا حياتكم وسط الناس
مرفوعي الراس
وبفخر تقولو ابونا شهيد
عارف ان فراق الاب
ده صعب اكيد
بس هلال رمضان بيغيب
علشان يطلع قمر العيد
و بكل حنين والشوق انا بكتب
اخر سطر في صفحة عمري
بايس ايدك داعي لربي
"يحفظ قلبك الاخضر ياما
يحفظ بلدي وتراب سينا"
فيها اندفن الحر وضحي
ما تفرق محمود من مينا
------------------------
#ناصر_قورة
من ديوان #بره_الدايرة

تعليق