كلمات / محمد عبد الرحيم
وقالوا الراضي كان ساكت
فإقروا الفاتحه بالتوفيق
فيقروا الهبل ع المجانين
ودايره عاشقه حُضْن الضِيق
تملى الرضا محله القلب
وامتى كات علامته سكوت؟!!
ب يميل العقل مره ب سَلْب
إيجابي القلب يِهوى الموت
مازال الصمت مش راضي
ب يعاتب لسه ف صمتي
ولَمَّا كلامنا كان قاضي
باعوكي برخص ياسلامتي
كلامنا مصاحب الشله
مناسب كان ولاد الزور
وقايل ع النفاق فُله
وارواحنا عشانه تغور
لإما ف قَطْر بِ يوَلَّع
او قضبانه حلفاله
تروح لَمَا ييجي تتقَلَّع
تبانشي هو اعطاله
ونثتثنوا من الاعطال
عقل بِ ينوي على موتنا
خبر عاجل يجيلنا مقال
يِبَكِّي الضحكه ف بيوتنا
ويقولوا الأمر على مايرام
وطقس الموت تملي يميل
رياح معتدله كله تمام
وتهمة تيجي لِ الصواميل
صداها فَكَّك المسامير
لَكن السكه دي جميله
وفكره ياخلق برضو حمير
نشيل عامل ف تحويله
دا كان نعسان وتلبسه لَبْس
ف إعلامنا يقولوا لو فاق
ولا كان اترمى ف الحَبْس
ومَرمي معاه السواق
وحتى الزحمه ف العاصمه
بِ تِبقى خاضعه للتفسير
وكام رسام رسم رسمه
سلوكنا السلبي يبدو خطير
ويحيا مرورنا بِ ينَظَّم
على ارواحنا هو حريص
لكن الأمر مِتْأزَّم
فداه ما بيروحش غير اتوبيس
عشان سواقه بنضاره
مراسل شافه م الأهرام
وكانله السَبْق بِ جداره
وظابط مرورنا أما همام
انقذ واحد من الأموات
لكن ياخسارة الجزمه
بتاعت الباشا فيها رباط
من المجهود لهوش لازمه
ولَ اجل زيادة السكان
بَحْر رشيد هياسهم
على قدره من الإمكان
وعقله كبير كان فاهم
فَلَبَّى الأمر على غفله
وقال الموج آهو هادي
فراح لِ شيخ وكام طفله
وع الشبان راح منادي
حنين حضني تعالولي
طالما حضنها جافي
انا طيب هتدعولي
امانه يابحر لو دافي
سِن الَعضْم لينا سيوف
ودمعنا نار ليها تحرق
دا كنا غلابه حضنا الخوف
وكام للحلم كات تسرق
وانا اللي ب أعاتب ف صمتي
فإقرا الفاتحه بالتوفيق
يابَحْر لِ جته قول نمتي
براحتك لَمَّا سبتي الضِيق
