دهاليز التوهة (من درر قصائدي)
الأولة غربتي
والضلمة سجّاني
والثانية سكتي
والتوهة وخداني
والثالثة كلمتي
وهقولها من تاني
آه ياعيني آه
ع الوعد والمسطور
إمتى ياليل الغربة
عنيا اشوف النور
الغربة مرة بره
وأمر بألف مرة
الغربة الساكنة فيا
والتوهة إللي بتاخدني
وتدور وتلف بيا
وأتكعبل في الملف
وأقوم من تاني ألف
مشدود من وداني
أرجع لبدايتي تاني
ومن تاني أرجع وألف
ولما الجوع ينهشني
أسف ترابها سف
محروم من الأماني
ممنوع من الأغاني
بكرامتي إللي بيوجعها
الشد من وداني
وفي وسط التلافيف
ماسمعت غير حفيف
أوراق الشجر الجافة
من هجمة الخريف
وف دهاليز العتمة
تخطفني الخطاطيف
تقطم لها كام قطمة
من بدني الضعيف
الأولة شكوتي
من دنيا ظلماني
والثانية أهرتي
من مر في لساني
والثالثة حسرتي
على ضحكة وحشاني
ياضحكة بعيدة عليا
إعملي معروف فيا
زوريني في السنة مرة
وردي روحي شوية
أنا روحي طالعة بره
من طعم الدنيا المرة
ماهي دنيا بتفتن فينا
تعمل قال إيه بتكسينا
ونتغطى بيها نتعرى
بقلم طارق السيد