مقامة الباديه ( 28)
الليله ليلة مصحصحه--وابواب السما مفتحه--والراوي آخر رحرحه--نايم وفاقد السمع--وانا أصلي آخر دردحه--حبيت اكلمكم ببحبحه--وأشاور معاكم عالوجع--نبطل كﻻم بلجلجه--ونخلي المعاني مفجفجه--ونشوف معاكم الحلحله--من غير ركاكه وﻻبدع--الضحك ليه بصهلله--والحزن ليه بنهنهه--بنبالغ أوي في الرئرئه--تلقي المياعه في الدلع--ونحب النواح والمحزنه--وننصب سرادق للدموع والسئسئه--وننزل علي الراس بالدئدئه--وفي عز الفرح بنتفزع--واﻷكل بنهم وفجعنه--أو تسالي ونأنئه --والشرب يبقي بدلدئه --ونقول دي معده وصابها الوجع--وفي الكره غل وزنجره--وفي الحب نفتح قلوبنا ببهوئه--والجفا نهجر وقلوبنا تبقي مغلقه--ونحتار ونضرب بالرمل والودع--وفي الحرص بخل وشحشحه--والبسط آخر بعزئه--ونتباها بسفه وشبرئه--خليت الجنيه منك جزع --واﻷكله تبقي محدئه--أو عادبه وحبكتها مشرشئه--والسكر زياده كأنه مفتئه--من طعمه رافض يتبلع--مابقيتش أمه موسطنه--يا نغالي وتبقي مزنئه--يانفرط لحد الهرهره--فين التقوي فين الورع--فين العدول و البسمله-- والبسمه لما تبقي مزهزهه--فين التجويد بالتفخيم والقلقله--راحت المعاني الطيبه من الكتاب ومن السمع--وانت يا أبو العضﻻت مكببه--سيبك بقي من الكسل والرحرحه--من غير عياط وﻻ نحنحه--شوفلك شغله بدل النوم ويا الكوع--وانتي ياحلوه يا متدلعه--ليه الزعيق والسرسعه--مع اللبانه والفرقعه--خليتي العريس منك خلع--الراوي صحى من الجلجله-- لقي الكﻻم فيه دندنه--جرس وسجع ولعلعه--قال دي مش مقامه دي شرشحه--ونصف الكﻻم مابيتبلع--قلت له انت زايد في الرحرحه--والباديه فايته ومروحه--حبيت أبوح مع بعبعه--يمكن يروق لك السمع--قال المقامه تكون بالفصحه المرصعه--وانا اقوله العاميه مش مخسعه--كلمه منه وكلمه مني الخلق بينا سمع--ورضينا بحكم الي سمع
للحديث بقيه مع مقامه أخرى إن شاء الله
قلم السيد شوقي السيد