مش فارقه ..

فى ناس شيفينها مهيش فارقه
وكأنك يا ابوزيد ما غزيت
ولا كان ليها لذمه تقوم ثوره
ولا حتى ياسيسي كمان جيت
وضع التعليم بقى فى النازل
والصحه مهازل فى مهازل
ودولار فى الطالع والنازل
بيجنن كل الاسعار
وزمان كنا بنشكى اللحمه
او حبه فته وممبار
دلوقتى العيشه بقت صعبه
والدخل ما بيجبش خضار
وفساد الناس المحميه
وديون داخليه وخارجيه
تدفعها الاجيال الجايه
وجنيه بقى قيمته بتنهار
ودى ناس وهى عايشه فى وسطينا
وعيونهم دايما فى عنينا
لابسين النظاره السوداء
ويسودوا عيشه اهالينا
وبسرعه اهه نسيوا التوريث
و ال30 سنه حسنى رئيس
وما كنش تداول للسلطه
والحزب بينجح تدليس
ونسيتوا الامن ايام مرسي
وكتايب من كل مكان
يستعفوا بيهم على جيشكم
ويمكنوا حكم الاخوان
حتقول لى التعليم والصحه
والدعم يادوب حبه فكه
انا حمسك اعصابي معاكم
مش عايز اقول الفاظ جارحه
هوه التعليم حيعوز كام ؟
والصحه علاجها فى كام عام ؟
والتنميه صحتها بعافيه
وفلوس الدوله مهيش كافيه
يبقي احنا نعظم مواردنا
وحنصبر حزمه سنتين
وبدانا الخطه وكات ناجحه
وفي سنه بقي عندك قناتين
وبدانا بمشاريع تنميه
وكبارى وانفاق فى الميه
والطاقه وشبكه طرقات
وبنينا مساكن شعبيه
وبرامج تنميه بشريه
واراضى ومشاريع زراعيه
وتنميه للثروه السمكيه
وحيبقى فى شرق التفريعه
اكبر مناطقنا الصناعيه
وعشان النيه كانت خالصه
فى عمار الارض المصريه
كان لينا من الرب بشاير
ووهبنا من فضله هديه
وكشف لينا اكبر بير للغاز
على طرف حدودنا البحريه
حيكفى احتياجات نهضتنا
ونكون م الدول النفطيه
والاشيه حتلعب ويانا
ونسد ديونا الخارجيه
بس انت ما تقلع نظارتك
والبسلك عدسات طبيه
يمكن ربنا ينفخ صورتك
وتشوف بعيون الوطنيه....اشعار محمود طنطاوي