يا حلم مالك كده عاصى على الصابرين
يا حلم دحنا بنحلم نبقى بنى أدمين
يا حلم حلمك علينا دحنا مش عاصيين
حلم الغلابه زينا يتقال فى كلمه ونص
مش طمعنين فى قصور ولا فلوس تترس
حلم الغلابه فى لقمه وهدمه وبيت
ويبقى صاحب عمل او يبقى صاحب غيط
ويبقى عنده امل يتعلموا ولاده
وقرشه ناتج عمل بيعود على بلاده
بالزمه عندك شعب اطيب كده مننا
راضى بنصيبه وحامد على القليل ربنا
يا حلم ماتقوليش مين جاى ومين ماشى
ياحلم همى ملوش فى السلطه وكراسى
انا بس عايز اعيش مستور رافع راسى
الحوجه بتهدنى وتزل فى كرامتى
والشكوى دى احساس بيقل من قيمتى
نفسى الاقى وطن يضمنلى حريتى
وابقى صاحب رأى مفقدش بيه لقمتى
ناقص كمان ياحلم يبقالى حتة بيت
لو بالحجر ياحلم أبقا كده عديت
اوعى اكون ياحلم سرحت وتعديت
وحياة ابوك ياحلم اوعى تكون غضبان
حتى ان جاوزت الحلم . حلمك على الغلبان