جناب الكوماندا

جناب الكوماندا شبعنا كلام
وفجأة اتلزقنا اتلزقنا القفا
ربطنا الحزام الحزام الحزام
وقولنا تعدي وقلبي اكتفى
بعيشنا نغمس دُقَّة وفول
خطفتوا رغيفي وفولنا اختفى
وقوت الغلابة بتاكلوا الديابة
وتشرب في دمه في ساعة صفا
تنفض جيوبه وتفضح عيوبه
وستر المهيمن لروحه الدفا
تعرِّي هدومه يبان الحزام
دا لابس حزامه في قلب الخفا
وعادد فلوسه لأكل وايجار
ولو يوم هيمرض لربه الشفا
تخش ف جيوبه وتقسم معاه
بتهدم حياته وعيشه انتفى
جناب الكوماندا هتسمع كلامي
بلاش المغامرة بلاش الجفا
واسأل وشاور قبل الأوامر
داحاسب حسابه ونوره انطفى
وماشي بشعرة وخيطه رفيع
ولو زقة منك قوام انكفى
سامح لطف الله