لو هتساعد ساعد المريض
مش أبو ساعد زى الحديد
السليم لازم يشتغل
ويبزل جهد فى العمل
ويظبط حياته على قد دخله
على قد لحافه يمد رجله
بشوف ناس تشتكى م العيشه
ويصرفوا ليلاتى قهوه وشيشه
واللى يوماتى تايه وحاير
ويعفر فى اليوم علبتين سجاير
واللى بيلعب ع الطلبات
ويمد إيده ويقولك هات
واللى باين فى عينو القهر
وقايم م النوم آدان الضهر
وتقوله ليه متقومش بدرى
يقولك لازم اريح ضهرى
ويبكى وهوه زى الهلف
ويصرف على فرح تلاتين الف
حاجات تغيظ وحاجات تجن
بيشكى وهوه زى الجن
ناس اتعودت ع الشكوى
عاوزين يناموا ونأكلهم عجوه
انا مش متحامل ولا شرير
لكن بشوف م النوع دا كتير
خللى الشكوى للعيان
متبقاش سليم وتقول غلبان
منير خاطر