بقلمي / محمد البنا
زمــــان
نفث بتؤدة ما احتبسه في رئتيه من دخان ، ثم مال على جليسه هامسًا
- آدي آخرتها ، علّموهم أحلى علام ، اللي دكتور واللي مهندس ، واللي محاسب ، وف الآخر فتحوا قهوة !!
- طب يعني هما كانوا لقوا وظيفة واتبطروا عليها يا أبو حسين ، طب وكتاب الله عيال جدعان ، وبيفكروا يعملوا حاجة بدل القعدة ..
سكت للحظة ثم أردف
- يعني كان عاجبك الغرزة اللي كنا بنتحشر فيها! ، آدينا بنقعد دلوقتي على كراسي متنجدة وترابيزات عليها مفارش ناعمة ، ومعسّل نضيف يجلي الصدر
- يعني كانوا جابوا الفلوس دي من عرقهم ؟ّ! ، ما كل واحد فيهم خلّى أبوه باع قيراط من أرضه ، عشان يعملوا القهوة دي
صمت كمن تذكر شيئًا كان قد نسيّ ذكره ، ثم أردف
- ألا قوللي يا أبو أحمد ، هو مين اللي اشترى القراريط ؟
اعتدل فاردًا ظهره على خلفية المقعد ، تناول لي شيشته ، أفرغ في صدره بعض دخانها ، ثم أطلقه عاليًا وعيناه تتابعه
- علمي علمك ، إحنا ما شفناش غير الأفندي اللي جه وعاين الأرض وإداهم الفلوس ، غير كده ما نعرفشي حاجة عن المالك الجديد ، كأنه شبح أو سر م الأسرار.
أمسك عن الكلام فجأةً ، وتفحص حجر الشيشة ، التفت صائحًا
- يا علي ..يا علي ..هات حجرين تاني يا ابني
قاطعه رفيقه
- ما كفاية يا أبو أحمد ، الساعة عدت واحدة ، يادوب ننام ساعتين لحد النهار ما يشقشق
ضحك ملء شدقيه
- ننام ؟ ...ننام إزاي يا أبو حسين والحريم لسّه قدامها ساعة وأكتر ع المسلسل التركي ما يخلص ، وكمان هو أنت ما دريتشي ؟!
- ما دريتشي بإيه يا أبو أحمد
- الحكومة قفلت الهويس تلات تيام
التفت إلى صبي القهوة يتابعه وهو يرص الحجرين ، وما إن انتهى ، جذبه من جلبابه وأدناه منه هامسًا
- جهز لنا كام حجر يا وله بس معسل مستورد وليك الحلاوة
ضحك علي وقال
- يا حاج ..هو بقى فيه معسل بلدي ؟! ..ما خلاص يا حاج ...كان زمان .
