صك الموت
.............
وطول م الضحكه جوّايا
كفن مربوط
وطول م الدمع ف عيوني
يتيم الصوت
وطول م الحزن متجمّع
وجوّايا صبح محطوط
ح يفضل قلبي زي تابوت
و ح افضل عايشه عمري حداد
م انا المسجونه ف الذكرى
وانا السجّانه والجلاد
وطول ماهي غايبه عن عيني
ح تفضل كل حاجه سواد
دا لو بيني وبينها بلاد
ح اروح ماشيه على قدمي
ح اروح زاحفه على بطني
ح اروح لو عمري راح منّي
عشان اسمع لصوتها الصوت
لكن بيني وبينها جدار
ما يقبلش العبور إلا
بصك الموت
وانا العمر اللي ف الدنيا
مازال مربوط
وانا الدمعه اللي ف الملكوت
بتصرخ أااااه
أنا جبل الألم لمّا
بيغلي بركانين جوّاه
أنا صوت الوجع لمّا
بيوصل م العذاب لمداه
ومش عايزه لحياتي حياه
سوى ساعه تعود فيها
واخبّيها ما بين حضني
أرد عليها لو قالت
وأتكلّم وتسمعني
وتمسك إيدي بإيديها
تبوسها عشان تعطّرني
مانيش عايزه لحياتي حياه
مادام راحت بعيد عنّي
يارب الخلق صبّرني
د انا الأم اللي ضاع منها
عروسه ..
ما كمّلت عشرين
