إلكلام سافر وغاب
والحروف عامله إضراب
والقلم مش راضى يكتب
أمسكه بصوابعى يهرب
سألته مالك ساكت ليه
قال والحزن باين عليه
أنا ياما قلت كتير وكتبت
لاداريت مره ولا كذبت
زكريات العمر مكركبه
مش زى الناس مترتبه
ساعه افتكر يوم حزين
ويسيل منى دمع العنين
وساعه افتكر يوم سعيد
يرجعنى إنسان جديد
كنت صادق زى المرايه
م البدايه لحد النهاية
مشيت وياك كل الطريق
وكنت ليك أوفى صديق
بذلت جهد على العموم
وخففت عنك الهموم
خلاص خلص الكلام منى
متزعلشى ولا تخاصمنى
شرحت حالى شرح وافى
قلت الأساسى والإضافى
مقلتش دى أيوه ودى لأ
شهدت عليه شهادة حق
زهقت من كتر الكلام
وقلت أحسنلى اسكت وانام
يمكن لو سكت ارتاح
واعرف سكة الأفراح
منير خاطر