بروتين
قالوا بروتين الفول السوس
يجعل منك فحل جاموس
تاكل منه تخش ف حيط
تلقى حوافرك زي الموس
تحرت وحدك تلاتين غيط
لأ وكمان تنطح خرتيت
ومالوش أي أثار جانبية
غير بس إنك تبقى عبيط
قلت أنا آسف أصلي نباتي
والبروتين ممنوع لحالاتي
جزّوا سنانهم حمّروا عينهم
قلت ياأطعم سوس في الدنيا
ياأطعم من بروتين الحاتي
قلت إدوني إتنين كيلوا سوس
ورشوا عليهم رشة فول
قالوا عفارم قد القول
قب ياحلو بأي فلوس
ولا الوصفة دي مش عجباك
قلت صحيح أنا واد منحوس
قالوا إدفع وإرحم في قفاك
قلت دا حلم دا ولا كابوس
إيه يازماني أخرتها معاك
قالوا فهمت قلت غرمت
قالوا يافالح تبقى سلمت
آدي حكايتي أنا الأدباتي
وأدي القرد وأدي القرداتي
وأدي البيضة وأدي إللي سلقها
وأدي بجاحة عين بهواتي
بقلم طارق السيد