إبنيه ماتبنيلوش
إبني إبنك وماتبنيلوش
إن بنيتله ماهتبنيهوش
يصبح كأنه
كتكوت في عشة
عضامه هشة
في عصر الوحوش
وإن بنيته
وعليت في حيطه
بنيت بناية
عمرت بيته
شقيت قنايا
ترويله غيطه
وإديتلو ريشة
يرسم حياته
وإديتلو إبرة
يغزل بخيطه
أتواب طموحه
أو حتي يرفي
في شقوق جروحه
يمشي في طريقه
وفي وقت ضيقه
بعرق جبينه يتبل ريقه
إبني إبنك ماتبنيلوش
لايبقى سمكة
في بحر القروش
ولا وحش ضاري
ماتملكوش
يبقى سبع
وبقلب ليّن
ويكون حنيّن
مع الأليف
مايكونش هيّن
أو يوم ضعيف
مع الوحوش
ذات الكروش
نصيحة مني إبني إبنك
وماتبنيلوش
بقلم طارق السيد
أعجبني
