نفسى أضحك ضحك صافى
زى مبيضحكوا الأطفال
نفسى أجرى ع الشط حافى
وأعبى السعاده فى الشوال
عاوز اتصالح مع نفسى
وانسى أيام الخصام
وانسى همى وانسى يأسى
وافرش على الرمله وانام
بتمنى يبقالى جناحين
أطير بيهم فى السما
مش عايز أحس إنى سجين
محروم من النور والهوا
عاوز فرحه من كل نوع
وكفايه عشت كتير بآسى
حد يمسحلى الدموع
واشيل جميله على راسى
حد يشغل نفسه بيه
وأنا أشغل نفسى بيه
أحس إنه خايف عليه
وانا كمان بخاف عليه
كل دا امته هيحصل
عن قريب وللا بعيد
وللا مش ممكن راح اوصل
لو حتى هبدأ من جديد
منير خاطر