كل الايام اللي فاتتنى من عمري إتحسبت خمسات
بصيت في مرايا لقيت سنى أكبر من كل الجدات
وخريطة وشي بتجاعيدها
مافيهاش غير بحر دموع مالح
علشان أتفلتر واعيدها مع نفسي ضروري ان أتصالح
وأنا لسه ماروحتش ولا جيت
وبحب الوعظ في حواديت
أنا كل عيوبي اني جريت على دنيا ورفضت نتصافح
والعمر سبقني وخد جرحي على حفة بير
والماضي اهو رافض يسمح لي اعمل تغير
على ضهري رحايا بتطحنى
والكف الكاره متحنى
بدمى وداير بيغني
استبشر خير
والعين مكسورة ومعصورة ولا فص ليمون
والروح مركونه في كرتونه من أزل الكون
أنا ديما عاتب على الصورة
علشان بنصدق تفاصيلها
والكدبة إن كانت مقصوده
بتكون محكومة بتاثيرها
ودي حاجه بنعرف نعملها ديما بشجون
