سفينة الحلم
-------
من فوق ضهر سفينة الحلم التايهه ما بين شطين العمر الموج محاصرني بقاله سنين
بحاول أبعد عنه ولكن ههرب منه واروح علي فين؟!
فابدأ أنا وياه نتعارك و اصبر وكأن أنا أيوب
وأفضل اعافر فيه والآخر كالعادة بطلع مغلوب
---؛؛--؛؛---
من فوق ضهر سفينة الحلم ليالي الغربة كتير بتطول
حتي القمر اللي مهونلي غياب الصحبه
مبقاش بيطلع زي الأول
والكروان اللي مصبرني بلحن الفرحة
صابه صياد بشباكة الجارحه
ومسابليش غير صوت البكا والنوح ف وداني
حزن و رعب يهز كياني
---؛؛--؛؛---
من فوق ضهر سفينة الحلم
أنا بفرد غزل شباك القلب عشان تطلعلي عروسة البحر الساكنة في عمق محيط العشق
طمعان اني اعيش وياها سنيني الجايه حلاوة الحب
بس شباك القلب بتخرج فاضيه ودايبه من الحرمان
تاني بصبر نفسي بجملة بكرة انا هانرسي ف شط أمان
---؛؛--؛؛---
تفضل تايهه سفينة الحلم و انا وياها بتوه واحتار
لسه بعافر احاول اادف حتى ولو عكس التيار
مش خايف ماللي هيجرالي اصلا أنا ما املكش قرار
تتبدل لينا الأدوار
وكأننا بنمثل فيلم
من فوق ضهر سفينة الحلم
---؛؛--؛؛---
قصيدة #سغينة_الحلم
من ديوان #بره_الدايرة
#ناصر_قورة
أعجبني
