منير خاطر

لو فى يوم جيت على بالك
افتكرلى الحاجه الحلوه
والوحشه خليها فى خيالك
البنيآدم على بعضه شروه
محدش حلو على طول
زى ما الكتاب بيقول
ولا حد طول عمره وحش
غاوى الحوارات والبكش
الظروف دايما بتغير
والمرتاح غير المتحير
واللى تشوفه لابس متعايق
غير اللى عريان مدايق
والإنسان إبن البيئة
نظريه سليمة وحقيقة
يعنى المتربى فى الحاره
وعايش على فول أم سماره
غير المتربى فى القصر
وبيصحى من نومه العصر
واللى علامه حكومى يا بيه
غير اللى أهله صرفوا عليه
التعبان نعذره ونسامحه
منشوهشى كل ملامحه
هتلاقى جواه انسان
بس مشافشى عمرو حنان
لما نبقى كلنا واحد
إبقى حاسبنى يا عبد الواحد
منير خاطر