احساس غبي
تمت إضافة 2 من الصور الجديدة من قبل الشاعر ضياء الادريسي.17 مايو، الساعة 11:19 مساءً
انك توافق تترمي ف حضن الشيطان
انك توافق ترتدي ثوب الجبان
انك كمان
تقبل تموت علشان جنيه
انك توافق ع الغلط
انك تتوه وسط البشر
انك تبيع ابنك عشان
تقدر تعيش
انك مافيش عندك لطا
انك تعيش عمرك كدا
فوق الرصيف من غير غطا
تندم على فعل ومضى
انك تخاف شر القضا
انك فدا
غلطة قلم
انك تعيش تعبد " صنم "
انك تهين المحترم
انك توافق تتهزم
من أجنبي
احساس غبي
انك تخاف تفرح ساعات
تبكي سنين
تفطر عذاب هم وحداد
تخرق قانون
تخلف ميعاد
انك تكون غاوي العناد
تحرق ورود تزرع فساد
تهدم عمار تخرب ديار
ترفع شعار الخو..... !
تمسك عصاة الفرعنه !
تفتن هنا
تحلم تعيش مليون سنه
احساس غبي
انك تقول
احلامي بين صعب ومحال
انك تقول الانتقام شرعآ حلال
انك تكون زي الخيال
فعل انعكاس
طبع البشر
انك تنام وقت الخطر
انك تخون
نفسك عشان تفضل مابين سالم ، برئ
انك تشوف حلمك خجول
مع إن كان حلمك جرئ
انك تكون
ناكر جميل
انك تبيع حب الجميل
انك تطالب بالرحيل
انك تكون انت الدليل
للمهلكات
انك تعيش حالة شتات
انك تشوف الحب مات
انك تتوه وسط البلاد
انك تشوف نفسك وحيد
وسط الزحام
انك تقول ع الخير حرام
والخوف سلام
انك تكون عبد النظام
احساس غبي
انك توافق تتهزم علشان تعيش
مايهمنيش
إيه السبب
او
تبقى من حزب الكنب
لما الحقيقه بتتحجب
يبقى الأمانه بتترفع
يبقى النهايه بتتكتب
لما المودة بتتقطع
رأيك لا يمكن يتسمع
لو كنت بين الناس رخيص
جايز توافق تتهزم
فعل اعترافك بالغلط
اوعاك تخاف خوفك مرض والمفترض انك تموت
الا السكوت
وقت انتهاك حرمه ف عنيك
بالله عليك _ خليك ذكي
#ضياء_الادريسي
