منير خاطر

حط فعينك حصوة ملح
ياللى يوماتى بتسرح سرح
والناس قالوا عليك كذاب
ووحكايتك زفت وهباب
ويوماتى تدخل ع النت
تتمرقع وتقول أنا بت
نفسك تضحك ع البنات
وتحكى معاهم بالساعات
ويآمنولك على اسرارهم
وترجع فى الآخر تساومهم
وإيه رأيكو ياشباب فى الصوره
مش بردو حلوه وأموره
ويخشوا عليك ألف وميه
وتعليقات معظمها غبيه
إللى يشتم واللى يسب
واللى نفسه فى حالة حب
ونحس كأن الفيس صايم
ومتغطى فى سريرو ونايم
وأول مسيادتك بتصبح
معرفش ازاى كله يصحصح
شباب بالجنس مهووس
وماما بتديلو فلوس
ياعم قوم شوفلك شغلانه
أهلك م الناس الشقيانه
بيشوفوا المر عشان تصرف
ويوماتى جيوبهم تتجرف
إعقل بقى والنبى يا حماده
وبلاش تسمى نفسك غاده
وبطل بقى بالعالم تسرح
مبقاش ليك مبينا مطرح
منير خاطر