صبح يابو فريال
صباح القشطه ياخال
مالك شايل الطاجن
ولا صاحب فولكس فاجن
البت جالها عريس
واد حلو أوى وفييس
ودى حاجه بردو تزعل
حقك تفرح وتهلل
مهو جاى مستعجل راخر
وراكب المجرى الفاخر
عاوز يدخل ع العيد
ومحتاجه عفش وتنجيد
وانا جيبى ولا المسروق
وفلوسى كلها فى السوق
دبرنى أعمل إيه
دماغى منيش لاقيه
ياعم قوم متخافش
هنجيبلك كل العفش
واصحابنا الميه ميه
هيعملولك جمعيه
ويقبضوهالك الأول
متعقدهاش وتهول
الرجاله لبعضيها
ساعة الأزمة تلاقيها
وابقى اعزمهم ع الليله
وعشيهم عشوه جميله
وبارك للست رجاء
وعقبال أسماء ووفاء
اجمد وشد حيلك
لسه العرسان هتجيلك
مهو قالوا أبو البنات
همو للممات
منير خاطر