يوميات لص ندمان
اليوم تلاته من رمضان
ليه معرفشى مش راضى عن نفسى 
وحاسس إنى ماشى فى العكسى
وليل ونهار وياها بتخانق 
وبتعلقلى ليلاتى مشانق 
وآخرتها كات ليلة انبارح 
ونا قاعد فى همومى سارح 
جايه بتستهزق بصيامى 
وازاى صايم وانته حرامى
وقال إيه بتصلى التراويح 
أما صحيح راجل سريح 
قلتلها دى نقره ودى نقره
شكل الليله هتكون عكره 
متلمى الدور بقى وتنامى
عفاريتى بتتنطط قدامى
صعبان عليها الراجل الطيب 
اللى سرقت فلوسه قريب 
تلاقيه ياعينى كان محتاج 
ونص فلوسه ع العلاج 
هوه صحيح كان غلبان
بس انا بردو كمان تعبان 
إن مسرقتش مش هقدر اعيش 
والحلال مبيكفيش
قالت خلاص أفطر متصومشى
وانا كمان راح اسيبك وامشى 
واعمل ما بدالك لوحدك 
لازم تقف عند حدك
يمكن يوم ربنا يهديك 
ويكتر الحلال فى إيديك
منير خاطر