إعمل لى كباية شاى
وتعالى اشرحلى ليه وازاى
ليه أولادنا ف سينا بتموت
والقنوات شغاله توت توت
ليه فيه ناس بتشقلب حالنا
واللى ف إعلامنا ياناس أجهلنا
وكل ليله نشوف خناقات
بين ناس محترفين هيافات
ليه بلدنا فى حالة حرب
وإحنا فبعض نازلين ضرب
ليه اللى بنبنيه بنهده
والباب المفتوح بنسده
ليه المدارس إسم وبس
والتلاميذ كلها فى الدرس
ليه الغنى يسرق مال سايب
والفقير يدفعلو ضرايب
ليه فيه ناس بتموت م السمنه
وناس مش لاقيه حتة جبنه
ليه كل الشعب بقى بيتاجر
وساب الصنعه وجاب م الآخر
ليه المصرى بالليل مينامشى
وبالنهار ينام ميقومشى
ليه الأسطى عبد الدايم
بيتنو لحد العصر نايم
ليه وليه وليه وليه
هنقول إيه وللا إيه
والكلام هيفيد بإيه
منير خاطر