دوخينى يا لمونه
فى مكاتب الحكومه
تلف ع المصلحه سنين
ويبهدلوك الموظفين
علشان حتة ورقه مختومه
والأستاذ مجاش
مهو متعشاش
تلقاه فى قهوة أبو دومه
وهات شهاده يا تهامى
إنك الماثل امامى
بس من جهه معلومه
ومتنساش تختمها نسر
إن بعد العسر يسر
وهات طوابع
وبصمات صوابع
وربع زتون
وعلبة تونه
وهات فطار
وكيلو خيار
وبجنيه عيش
من الطابونه
واكشف باطنه
وكمان عيون
وتقرير بيقول
منتش مجنون
وسلمهم للابله سونه
وعد من دلوقتى شهر
وتعالى يومها بعد الضهر
واشكر المصلحه الحنونه
منير خاطر