ظاهرة قذرة – امتى ننضف
---------------------------
تبقى ف شغلك قاعد كافى
خيرك شرّك وابن اصول
تلقى مواطن داخل شايل
اللاب توب مع المحمول
تطلب منه يخش طابوره
تلقاه يصرخ فيك علطول
منتش عارف مين قدّامك
فوقو ياناس من اكل الفول
وانزلو اسيادكم منازلهم
واعرفو إن الايد هتطُول
(بابى ) برنة هيقطع عيشك
وكمان عمو راجل مسئول
لحظة و(مامى) تجيك م النادى
ف ايدها قرار انك منقول
هو انا ياابنى مواطن عادى
اى حواجز لينا تزول
انت عايزنى مع الناس ديا
اخد دورى واهز الطول
لأ ياحبيبى اكيد ش احنا
يلا بسرعة عشان مشغول
قلت امسك اعصابى واقله
فيه ف المصلحة 100مسئول
ف ايدهم فك رموز اوراقك
خط كرامتى مفيهش نزول
ويادوب لحظة لقيت الدنيا
جت تتاسف للشملول
حتى الساعى لقيته بيصرخ
حاول تدى الباشا حلول
قرب واحد منى وقال لى
اوعى الدرج يكون مقفول
قلت لايمكن ابيع ف ضميرى
قال من بكره انت المفصول
-----------------------
ياسر التونى
أعجبني
