بقلمي / محمد البنا
ومش عارف
ومش عارف ليه العبير
بيبان بلون
غير اللي عيني بتعشقه
ومش عارف
ليه رمش عينك صدّقه
وبيفرّقه...
على عطشانين
ليه السنين
مرّت كما
مر السحاب من خرم باب
ولا ساب أثر
ليه القمر
ما نزلشي ليلة يرتوي
من عين حزين
ليه الأنين
لابد ف عين ولا خطّهاش
والفرح ليه
ورا شمس عاش
ف منلمحوش
ولا حس بيه قلب العطش
من عاش ومات
جوّه الجروح
بنلومهُ ليه
على إنه مات
ونلومهُ ليه
على إنه عاش !!
