قصيدة الاسد والغزال

=============

اسد يكلم يعنى غزال ويقل له راحت عليك ياغزال

كنت فى عزك يعنى زمان والكعب كان عالى وفتان

والكل كان برضه حلفان ان القوام ده جنان فى جنان

وياما قلوب وعقول حيوان دابت فى سحرك ويا دلال

عيون مها وكمان غزلان والوجه تحفة وبدر تمام

يعنى فى عز شباب فى شباب والقلب منك فط و داب

وياما حمار مع فيل وحصان وتور وعجل وقرد كمان

وتعبان ودب وقط وديب اتمنوا منك يبقوا قريب

وغاروا منك الغوازل واشتغلوا فى كيد العوازل

لكن الشباب اهو ولى وراح والحسن غادر توبه خلاص

واللى ده كانوا فى يوم اصحاب دلوقت صاروا برضه سراب

يعنى مافيش اى مصالح والكل اصبح كده طالح

وكانوا يقولوا عليك امثال راحت عليك برضه ياغزال

ومافيش كمان اى احباب وده هو يعنى قانون الغاب

وينفعل ده غزال ويقول ده تقل دمك مش معقول

كنت الاسد يعنى ضرغام وحواليك ده صحبة غرام فى غرام

ملك يطيعه كتير وقليل فى عرشه واسمه برضه عرين

فى شباب وشادد كل الحيل وبالقوة تكسر برضه الغير

وبتفترس فى كتير وقليل وبتفترى على ايها مسكين

وظلمك ملا فى بحور انهار وفاض بشدة ليل ونهار

وعندك كتير زوجات وذكور والخير ده عنك مش معقول

والعزوة حلوة من حواليك والكل بايس تراب رجليك

حمار حصان او عجل كمان وفيل ودب ويا ابو قردان

الكل يبعت فى تحيات من كل انواع وابتسامات

دلوقت راح عصر الشباب ولا فى دى عزوة ولا حيوانات

قاعد فى جحرك كده مكسور والدنيا ضلمة من غير نور

عاجز ونايم كده مشلول بلسان بقوة فحل وتور

لا ملك فاضل ولا اصحاب عرشك ده قشة خراب فى سراب

قبل ماترغى ويايا لازم تبص فى مراية

ولاتعايرنى ولااعايرك ده الهم ده طايلنى وطايلك

ويبكى بحرقة ملك الغابة ويقول حقيقى احنا غلابة

دى الدنيا دايرة وقلابة ترفع وتدفن فى الغابة.

مع تحيات الفقير الى الله

ياسر شرف- كبير محررين مترجمين
بقطاع الاخبار- الاذاعة والتلفزيون