قصيدة بياع الكشرى
============
مكرونة عدس وتقلية ورز بدقة دى شهية
طبق ده كشرى الحلمية تاكله بمزاج على عربية
والشطة مخدومة بحنية وحمص وصلصة وردية
دى اكلة بلدى وشعبية مصرية برضه ووطنية
عن ابويا يعنى واهلية نفس وخبرة بفنية
ولقبى الشهير ده حمادة كشرى لانى يعنى بياع كشرى
باأعول فى امى واخواتى واصرف عليهم ده يوماتى
وناس دى فقرا وغلابة اديها كشرى بكمالة
تاكل وتشبع تدعى لى لكن فلوسها ماتدى لى
لكنى برضه باكون فرحان اهى صدقة تحمينى من النار
وزباينى تاكل بحرارة من بره ومن اهل الحارة
ده عم عبده الميكانيكى وسليم وحسنى برضه صديقى
وحسن وسوكة العجلاتى بياكلوا شهرى ويوماتى
ومرت فى مرة مزاية بملاية سودا وعباية
دلقت فى قلبى كوباية شطة ودقة بكفاية
وقلت اخبط كده عالباب واجيب لها كشرى وكباب
وقعدت برضه مع ابوها وعمها وميمى اخوها
ورحبوا لكن بحساب وقالوا لازم كتب كتاب
وقلت وماله ده كفاية عذاب اغرف وادى للاحباب
ومليت لها كشرى بتقلية وفى قلبى شطة بحنية
واصبحنا اشهر كشرية ونافسنا برضه الطعمية.

مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون