عاجل
مطلوب عريس
يعرف يدوقنى الحنين
سنه فوق العشرين
مش مهم يكون منين
مصرى ولا من فلسطين
لبنانى ولا من البحرين
بس لازم يكون جميل
دمه خفيف مش تقيل
مايجيش ويودع 
ولا يخلى قلبى يتوجع
يعوض حرمان سنين
اصغر منى ولا اكبر
المهم ما يكونش متكبر
وابن ناس طيبين
يغير عليا ويحاسبنى
ولا مرة ايده تضربنى
وان غاب عنى واسأله
بالصدق لازم يجاوبنى
من غير ما يحلف يمين
عينه مليانه وشبعانة 
مش بصباص ولا بوشين
يعودنى عالصراحة
واعيش معاه مرتاحة
مايفوتش علينا ثانية
واحنا زعلانين

يؤمر وينهى من غير سيف
يكون تقيل مش خفيف
ولما أغلط ذى اى حد
يكون حنين مش عنيف
يعرف يجيب الرغيف
والناس تخاف تظلمنى
لانه قوى مش ضعيف
بس معايا كله حنان
يحسسنى بالامان
يسمعنى غزل وحب 

محرومة منه من زمان
احس معاه ان انا انسانة
مش حاسة باى خوف
احس بقلقه وانا نعبانة
ويعيش معايا بالمعروف
يحقق حلمى اللى 
مركون عالرفوف
يحررنى من سجن الظروف
يخلينى بعينى اشوف
فرحة ماليا الدفوف
مطلوب عريس يكون عطوف
مش مهم يسكنى فين
المهم سكتنا واحدة
يعرف يصحى مشاعرى الباردة
ويهدينى دنيا فاردة
جناحتها عالسنين
مطلوب عريس
يريحنى بكلمتين
واحرك قلبه واصحى نبضه 
لو شاف منى دمعتين
مطلوب عريس
الشاعرة مرفت موافى