كنت استقل أتوبيس السوبر جيت لقضاء إجازة العيد مع أهلي في الصعيد بمحافظة الأقصر وعند مدخل مدينة نقادة بمحافظة قنا تم إيقاف الأتوبيس.
صعد إلي الأتوبيس ضابط شرطة برتبة ملازم أول أحمد فتحي عرفت اسمه بعد كده وكان معاه ٢أمناء شرطة وكان بيطلب البطاقات الشخصية وانا لم اكن منتبه
توجه نحوي وقال لي طلع بطاقتك فقلت له ماشي وانا بأطلع البطاقة رفع صوته وقال "خلص بسرعة يا لا".رفضت أسلوبه وقلت له "انت مش من حقك تكلمني بالطريقة دي ومفيش قانون طوارئ يبرر كده والدنيا تغيرت . فيه ثورة حصلت في البلد ضد التعامل بالطريقة دي"
رد وقال لي
"جيب البطاقة"
وأعطيته البطاقة وبعدها قال لي
"انت مش عامل نفسك راجل كمل لحد الآخر وشوف اللي حيحصل لك ايه"
ورفضت النزول معاه
بعدها مباشرة كلمت مساعد وزير العدل أمين لجنة تقصي الحقائق اللي انا عضو فيها وشرحت له الموقف فقال لي : حدد لي مكانك بالضبط وانا حاتصرف
رفضت النزول وكلمت على طول مستشار الرئيس المهندس محمد سيف الدولة ابلغه بالأمر
وانا باكلم مستشار الرئيس صعد الأتوبيس ملازم اول محمد عمر عرفت اسمه بعد كده وخطف التليفون من ايدي وشدني من ذراعي وضربني في بطني بالبوكس
الخط كان مفتوح ومستشار الرئيس سمع كل حاجة وسمع الشتيمة القبيحة من الضابط ولما شدني الضابط دفعني ناحية سلم الأتوبيس والجنود بعدها استلموني
كل واحد من الجنود كان ماسكني من ناحية والضابط كان بيضربني في اللحظة دي بإيديه ورجليه وشدوني ناحية الضابط الأول أحمد فتحي ولما شافني قاللي
"اديك نزلت بالعافية يا ابن الو**ة"
وحط إيده في جيبه وطلع قطعة حشيش من جيبه وقال لي
"انا حلبسك قضية المخدرات دي وحاكتب في المحضر أني ضبطتها معاك يام**ص وخلي حد يطلعك من الناس اللي بتكلمها"
فقلت له "وضميرك فين ؟!"
قال لي
"ضميري عند أمك يا ابن المرة......."
بعدها مباشرة الضرب اشتغل فيه تاني وأخذوا يضربوني ويدفعوني على عربية البوكس ويمارسوا أسلوب القهر ضدي وشتائم لا يمكن وصفها
الناس اللي راكبة في الأتوبيس شافت الكلام ده فصعبت عليها فنزلوا يترجوا الضباط فقالوا ليهم
"ده كلب ولازم نعلمه الأدب ويبقي حد يطلعه من عندنا"
الضباط مشوا الأتوبيس وكنت لوحدي واخدوا التليفون مني وجاني الضابط أحمد فتحي وقال لي
"الثورة في التليفزيون بس مش هنا، هنا مافيش ثورة"
وقال لي
"انت حتقعد معانا أسبوع اتنين ثلاثة لحد ما نشوف مين اللي حيقدر يطلعك"
وركبوني عربية البوكس وركب معايا عسكري فقلت له
"عاوز اعمل مكالمة"
العسكري قال لي
"مش حاقدر أديك التليفون قدامهم"
فقلت له
"حاديك فلوس"
فوافق وقال
"لما يمشوا بعيد عن العربية لأنك لو ماكلمتش حد حيموتوك في القسم"
الضابط رجع البوكس وقال لي
"انت بقي بتاع الثورة وتبع لجنة تقصي الحقائق طاب ابقي جيب حقك الأول علشان تعرف تجيب حق اللي راحوا لأنك حتحصلهم"
وبعدها نزلوني من العربية وركبوني عربية تانية وكان راكب فيها ٤شباب غلابة جداً وسمعت الضابط بيقول
"العيال دي معاهم حشيش كمان ولازم محضر ليهم"
وصلنا قسم شرطة نقادة وهناك كان رئيس المباحث منتظرني اول مانزلت من العربية وقال لي
"أتفضل معاي على مكتبي"
وكنت وقتها منهك تماماً
كنت ماسك بطني من الضرب وطلبت منه انه يجيب لي تليفوني من الضابط فجاب لي التليفون وعملت اتصالاتي بناس كتير علشان أقول لهم انا فين بالضبط
كلمني بعدها مساعد وير العدل وقال لي
"الدنيا كلها عرفت بموضوعك وماتخافش"
وبعدها بشوية جاءني ٣عمداء وعقيد أحدهم رئيس شعبة واعتذروا لي فرفضت
بعدها كلمني مساعد وزير الداخلية مدير الأمن واعتذر لي فرفضت اعتذاره وقلت له
"انا عاوز حقي ومش حسيب حقي أبدا لو حصل ايه وانا مش حاسكت أبدا"
فجأة لقيت اتصال من المستشار العظيم زكريا عبد العزيز وقال لي
"انا حالا سامع باللي حصل ليك اوعي تنتنازل عن حقك يا تقادم وكلنا معاك"
كلمت بعدها ناس كتيير علشان الأمر يتحول لقضية رأي عام وكلمت مستشار الرئيس مرة تانية وقلت له
"بلغ الرئيس باللي حصل معايا"
بعدها انتقل مدير الأمن للقسم وجاءني وقال لي
"انا باعتذر بشدة عن اللي حصل والعيال دي حنعرف نأدبها"
رفضت اعتذاره وقلت له
"انا عاوز حقي مش حسيبه"
مدير الأمن تركني وقعد مع ضباطه على انفراد وحرروا محضر ضدي أني قمت بالاعتداء على الضباط الثلاثة وعلى القوة وعددها ١٧عسكري معاهم
مدير الأمن كان بيتظاهر انه معايا بس هو الحقيقة كان في صف الضباط بتوعه
كلمت مالك عدلي الناشط الحقوقي فقال لي
"لازم تعمل محضر في القسم وتذكر فيه كل الوقائع"
وفعلا عملت كده وحررت المحضر في وجود مدير الأمن ووجهت الاتهامات
مستشار الرئيس كلم وزير الداخلية فرد عليه الوزير و وقال له
"اصلهم لقوا معاه حشيش"
فقال له مستشار الرئيس
"ده اكاديمي وعيب انتوا عاوزين خالد سعيد تاني"
بعدها رجع وزير الداخلية وأخبر مستشار الرئيس أني واقعة الحشيش مش معايا مع حد تاني وطبعا هم العيال الغلابة اللي لفقوا لهم القضية
وصل عندي شباب الجمعية الوطنية في قنا والمحامين معاهم وحضروا كتابة المحضرضد الضباط ومالك عدلي كان بعت ٣ تلغراف لوزيرالداخلية والنائب العام
د.هبةرؤوف كانت كلمتني وقالت ماتسيبش الشباب الغلابة فكلمت مدير الأمن وقلت له لازم الناس دي تخرج وفعلا تم إطلاق سراحهم الساعة ٧الصبح
الساعة٩الصبح جاءني مساعد وزير العدل لقطاع الجنوب وحاول بكل الطرق والوسائل انه يخليني أتنازل رفضت بشدة وقلت له عاوز حقي مش حأسيب حقي
مورست علي ضغوط كبيرة جداً للتنازل فقط عن المحضر رفضت تماماً وحينها أدركت أني محتجز في القسم علشان كده فرفضت وطالبت بعرضي على النيابة
كلمت مستشار الرئيس وقلت له "انا محتجز وانت مش قادر تطلعني من القسم دول بيضغطوا على علشان أتنازل وكمان بيهددوني"
فقال لي "إياك تتنازل" وحينها عرفت ان مستشار الرئيس مغلوب على أمره
فعلا تم عرضي على النيابة والضباط أتحقق معاهم لمدة ٦ساعات واللي حقق معايا كان مساعد المحامي العام وكان رجلا في غاية التهذيب والاحترام
أثناء عرضي على النيابة كلمني مستشارين للرئيس احدهما القانوني والآخر للأمن القومي فكانت جملتي لهم
"طهروا الداخلية وقولوا لمرسي طهر الداخلية"
تم إخلاء سبيلي بضمان محل إقامتي وكذلك الضابطين والقضية مستمرة والشهود متواجدين ولن أتراجع أبدا واحمل مرسي المسئولية الكاملة لما حدث معي
وبالامس تحدث وزير التعليم العالي مع وزير الداخلية اعتراضا على ماحدث معي فكذبها وزير الداخلية وادعي بأنني كنت راكب أتوبيس سياحي وان الضباط أرادوا إنزالي من أتوبيس السياحة ليركبوني عربية تانية وطلبوا بطاقتي واعترضوا ...
وزير الداخلية كذاب وسأقاضيه ولن أتراجع
مرسي عرف كل شيء عن ماحدث معي من خلال مستشاريه فماذا سيكون رد فعله..ولهذا احمله المسئولية الكاملة ولن أتنازل أبدا عن حقي
الغلابة اللي مايعرفوش حد يروحوا فين ياناس ...إلي متي ستظل أرواح المصريين تزهق داخل أقسام الشرطة التي هي أوكار للتعذيب حتي متي
