الاسطوانه والديسك والبليه هات بتوع الدايو ماتز المساعدين اي فرع من فروع شركه مونرو الفرنساوي وموجوده في كل حته خصوصا شارع شمبليون وسط البلد او شارع دمشق

مروحه الرداتير دايو ماتز وبتعمل من 200 الي 350 البوجيهات اطلع علي توكيل ان جي كيه خلف توكيل كيا بالمعادي والاربعه هيعملو من 50 الي 60 ودول اصلي مش صيني ونصيحه مني ليك جرب البوجيهات البلتنيوم هي اغلي شويه بس حاجه تانيه في الاداء

نفس الموضوع بالنسبه لسلوك البوجيهات انزل شارع دمشق وهتلائيها بتعمل ابتدائا من 70 الي 180 جنيه

وسلوك اسبور كمان اجمد من الاصلي بتاعها السيور اخلع القديم وعند اي حد بتاع قطع غيار هيجبلك نفس المقاس والشكل والطريقه دي تعملها في اي حاجه هتغيرها بعد كدا يعني تفك القديم وتاخده معاك وتطابقه بس

محرك السيارة هافى لوبو هو نفسه أو مستوحى من محركات السيارة سوزوكى ألتو و شانا بينى و أيديا
و الكوده DA465Q للمحرك سعة 1000 CC أو DA468Q سعة 1100 CC
و بناء عليه يمكنك أن تبحث عن موزعى قطع غيار السوزوكى أو توكيل الشانا بينى ربما تجد قطع الغيار المطلوبة أو مشابهة لها بأسعار أفضل
و لكن الفانوس أعتقد أنك لن تجده سوى فى التوكيل
عموما فى هذا الموضوع قائمة بمحلات بيع قطع غيار الإسبيرانزا و الكثير منهم يتعامل فى قطع غيار الصينى بوجه عام و خاصة محلات شارع دمشق و التوفيقية.

أما بخصوص الميكانيكية
فالسيارات الصينى ليست قادمة من المريخ و لم يتم تصنيعها على يد علماء الذرة و مبادىء الميكانيكا و المحركات متشابهة غالبا بل الأكثر من ذلك التكنولوجيا المستخدمة فى السيارات الصينى تعود للتسعينات و ربما الثمانينات و عن تجربة أى فنى ماهر و أمين يمكن أن يتعامل بنجاح مع أى سيارة صينى.

الموبينا بتاعتها هيا بتاعت هونداي 

زى ما أحنا عارفين مواتير السيارات بتبقى خارجة من المصنع وبتطلع عزم معينة وهورس باور معين, وللأسف المواتير بتضعف مع الأستهلاك وممكن الموتور يفقد الى 50% من قوته الأصلية بسبب قلة العناية بيه, وفى الغالب جميع العربيات اللى ماشية فى الشارع الموتور بتاعها مابيطلعش غير 70% من قوته الأصلية.
الموتور عبارة عن منظومة متاكملة كل قطعة فيه بتعتمد على قطعة تانية, لو حاجة باظت ومأ تغيرتش بتأثر على حاجة تانية وهكذا وتؤثر على الموتور ككل.
وللحصول على أفضل أداء من الموتور الحالى بدون تعديلات يجب مراعاة الأتى:-


1- ودى أهم حاجة, تغيير فلتر البنزين كل 3000 كيلو, البنزين فى مصر مليان شوائب حتى لو 98 والفلتر بيتسد قبل معاد تغييره وبيخنق العربية والسحب بيقل

2- تانى أهم حاجة, تغيير فلتر الهواء كل 3000 كيلو برضه مع مراعاة تنظيفه كل أسبوع أو أسبوعين لأن تراكم التراب فى الفلتر بيمنع الهواء من الدخول للموتور وصدقنى هتحس بفرق جامد سواء بعد التغيير أو التنضيف.

3-تغيير الزيت وفلتر الزيت فى معاده ويا حبذا لو قبله, لأن مهما فلتر الهواء والبنزين عملوا الزيت بيتراكم فيه شوائب بتسد فلتر الزيت وبتخلى العربية تسخن بسرعة, ده غير أنها بتجرح فى جدران السلندر وبتزود لزوجة الزيت وبتقلل عمر الموتور, وطبعا كله شايف التراب فى الجو عامل أزاى والبنزين مليان هباب.

4- أوعى تجيب زيت 10000 أو 5000 لأن زى ماقلت قبل كده الزيت بيتجمع فيه تراب وهباب بيبوظ الموتور وكمان الفلتر كده كده هيتغير كل 3000 أو 5000 كيلو, فمهما كان الزيت مدة تغييره طويلة ده مش معناه أنه مش هيجمع شوائب وتراب.

5- الكشف على منظومة الشكمان كل فين وفين, الشكمان لو جزء فيه مسدود أو مثنى هيأثر تأثير مالوش حل على أداء العربية و أسال مجرب, الشكمان كان مسدود والعربية كانت زبالة ولا حتى راضية تفصل (علشان مبتعديش 5000 لفة) خدت خبطة فى الضهر بالحظ العربية بقت صاروخ بالنسبة لحالتها الأصلية (الخبطة عدلت الشكمان).

6- حاول تجيب منظف للرشاشات كل فترة, علشان الرشاشات بتتسد من الشوائب اللى فى البنزين والمفروض تتنضف كل فترة وفترة, ولو الرشاشات بقالها كتير متنضفتش ممكن تنضفها بالموجات فوق الصوتية عند متخصص والفرق هيبان.

7- حاول تكشف على طلمبة البنزين لو بقالك كتير مغيرتهاش عند الميكانيكى علشان لو الطلمبة ضعيفة الضغط فى خط الوقود بيقل والعربية بتضعف.

8- البوجيهات ثم البوجيهات ثم البوجيهات, حاول تغير البوجيهات كل 20000 أو 15000 كيلو وخلى معاك مفتاح بوجيهات علشان كل فترة تفكهم وتنضفهم وتعرف حالة العربية من لون البوجيه وهل البوجيه عليه زيت ولا لأ وخليك فى بوجيهات ngk و BOSCH وسيبك من البوجيهات 2 و 3 شمعة, والتزم بمقاسات البوجيه الأصلية بتاعت العربية.

9- حتة تعديل: حاول تجيب أسلاك بوجيها قطرها أكبر من اللى فى العربية علشان مقاومة السلك تقل وبالتالى الشرارة قوتها هتزيد.

10- حاول كل فترة وفترة تضغط على موتور العربية بأنك تنقل على عدد لفات عالى علشان تفوق الموتور ولو فيه شوائب فى دورة البنزين تتشال.

11- الهورس باور والعزم مش مهم على قد مامهم هو بيطلع أمتى يعنى عربية زى الفيرنا موتورها بيطلع أقصى قدرة ليه عند عدد لفات قليل على عكس عربية زى اللانوس أقصى قدرة ليها بتطلع متأخر, علشان كده الفيرنا بتسبق اللانوس على السرعات القليلة لكن على السرعات العالية اللانوس تكسب, فحاول تخلى نقلاتك عند عدد لفات مناسب علشان تستفيد من قوة الموتور.

ودول حاجتين زيادة:-
12- الأطارات هى أهم حاجة فى العربية و أهم من الموتور كمان, العربية من غير موتور ينفع تمشى أنما من غير عجل بح, حاول تغير الأطارات كل 40000 أو 50000 كيلو, لو الموتور هو اللى بيعمل القوة فالأطارات هى اللى بتستخدمها, وموتور 1000 حصان ولا ليه لازمة من غير عجل.

13-غير تيل الفرامل كل 3 شهور, حتى لو مسمعتش صوت الصرير الرذل, ومع التغيير خلى الميكانيكى يكشف على المنظومة كلها ويكشف على الزيت علشان الفرامل تعتبر حياتك - تقدر توقف العربية من غير فرامل ولو حد عايز يعرف أزاى أسألنى
<!--<!--- .
العربية زى الأستثمار بالظبط أعتنى بيها وأعملها الصيانات الدورية وصدقنى عمرها ماهتزعلك ده بالعكس لو بتحب عربيتك وفيه ربع ضارب فى دماغك زيى هتحس بفرحتها.

وأه أنا عارف أن معظم اللى فوق صيانات دورية بس فيه ناس كتير بتطنش أو بتنسى فقلت أفكركوا, وكمان ديه حاجات بسيطة بس تأثيرها كبير وفيه أحصنة كتير بتهرب من الموتور بسببها وأهم حاجة فلتر الهواء والبنزين.
وياريت اللى عنده حاجة تانية يقولها يمكن أنا نسيت أكتبها أو معرفهاش( نياههههههها)
والى اللقاء فى حلقة قادمة.