جيل الزمان الغتيت

ابويا من زمن تاني كل ما اجي اكلمه يقولي انت مش عارف حاجة مش تستشيريني
الاول
وكانه علامة القرن وده بيخنقني
انا مش متجني عليه والله وهحكيلكم هو ليه خنقني
لما كنت طفل كان بيتعامل معايا من منطلق كل شئ عيب وحرام ولما ابتديت
اكبر اختار اللعبة اللي هلعبها انا كنت عايز العب سباحة وكاراتيه وهو
مقدم لي في التنس يا عم هو انت اللي هتلعب اللعبة ولا انا
اقوله يا عم سبني اروح النادي لوحدي يشكك في اني مش هعرف
وفي مرة روحت لوحدي عملي قلبان في دماغي ده لحد الاعدادية
طبعا مجبور اخش المدارس اللي بيشوفها كويسة رغم اني زعلت منه لما فرقني
عن اصحابي في المدرسة الثانوية كل اصحابي راحو التوفيقية وانا روحت
محمد فريد وهي اقل مستوى بس مش مشكلة لاني رتبت وطلعت التاني في الثانوية
العامة وده كله لانها كانت مدرسته وعمامي اتخرجو منها على الرغم اني كنت
مرتب على ادارتي في الاعدادية وممكن اروح اي مدرسة خارج مربعي السكني
لما حبيت اخش الكليه نطلي وقالي متروحش صيدلة اسماعلية وطبعا اسكندرية
مرفوضة والسبب مش هتعرف تنجح وانت لوحدك هتبوظ هناك وامي تقولي عينك
هتزوغ على بنات المصايف اقولهم هنجح واحول على القاهرة بعد سنة بس طب
اسنان القاهرة احسن لي مش ده كلامهم
وعمي اللي عمل كوبري هناك في المانيا ومعجب بشغل الدكاترة ويقول ده
طبيب الاسنان هناك بعد الجواهرجي وهو اللي شار عليهم يظغطوا عليا عشان
اجي طب اسنان القاهرة
المأساه بتكرر لما قررت الالتحاق بمعهد السينما قسم اخراج وقولتلهم ده
مستقبلي وهم يقولو ده لعب عيال وكنت رايح اقدم من وراهم بس وقفو في
طريقي تاني
لوقالوا لما تخلص كليتك
واديني معكوك في التكليف ومش عارف اخلص من جنوب جهنم احمممممم.....
قصدي سيناء
لما جيت عشان اخطب امي تقولي عروستك عندي وابويا يقولي هتخطب بايه يا
بني لما عقدوني من الجواز
التدخل في موضوع التكليف كان الطامة الكبرى لما جيت اتظلم عشان اخرج من
بني سويف للجنوب جهنم .....معلش غلطت تاني سيناء قالولي ليه يا ابني
وانا كنت سالت والدي اعمل ايه قالي يا بني اتصرف براحتك ومتاخدش رأي
تاني واتورطت وسمعت كلام ناس معقدة نفسيا وكارهة نفسها وقالو جنوب جهنم
احممم المرة ديه انا قاصد احسن مكان للتكليف انتخة وفلوس وحريم احممم
مزز اجانب سياحة بقى ولم يصدقو الا في المزز لانهم قالعين من الحر والبرد
مش عارف ليه
والله انا مش ناكر الجميل لان ابويا صاحب وجودي بعد ربنا طبعا وهو صرف
عليا لما بقيت شحط ودكتور اد الدنيا وبقبض 296.60 جنيه مرتب وحوافز
هو ساعدني بفلوس مصاريفي لكن دايما بعيد عن قرارتي المصيرية ولما يهرب
مني يقولي كلم عمك الكبير هو واخد دكتوراة من المانيا ومخه يوزن دول
العالم والمجرة كلها ماشي ياعم الجوهرة بس انا ليا رائ في حاجات انا
اللي بتحمل عواقبها بعد كده مش هوا
المهم لازم تكونوا ارائكم من نفسكم ومرة تصيب وعشرة يخيبوا ومش هنتعلم
الصح الا من الغلط
تدخلات والدي وصلت لقصة الشعر متطولش شعرك وتعمل قصات انجليزي متطولش
سوالفك متطولش ذقنك متلبس جينز متكلش برا متشربش شيشة ولا سجاير بلاش
بنات تكلمك في البيت حتى زمايلي اه حتى زمايلك البنات في الكلية متتكلمش
عنهم وكانهم جربة
في مرة بقول ليا واحدة زملتي النهاردة كانت جاية الامتحان ب بادي استومك
يروح يقولي متكلمهاش تاني وانت مالك يا عم كل زمن ليه احكامه
مش هتكلم على موضوع النت لانه قطع كمية اسلاك تليفون تمنها يعدي ال300
جنيه وبوظ كل فيش التليفون
الحلو انه كمان بيحب ينزل معايا وانا بشتري اي حاجة تخصني وبخاصة اللبس
البس ده ومتلبس ده انت كبرت ولازم تلبس لبس محترم لانك دكتور وكبرت هو
الموضوع يخنق بجد بس اعمل ايه
ابويا هخرطه للبط
ومازال التدخل موجود و ينده والدتي وهي نايمة بصي شايفة ابنك جاي متاخر
من برا الساعة كام وكانت الساعة معدتش 2 وفي الصيف
ولما عرف اني بشرب سجاير علق المقصلة ازاي تشرب سجاير وانت مبتصرفش على
نفسك ولما تصرف على نفسك ابقى اشرب زفت مش هقولك تعمل ايه انت مش هتقدر
تشيل مسئوليه بيت ابدا وهو كان بيشرب السجاير من ساعة ما وعي على
الدنيا وكله كوم والكمبيوتر كوم تاني ده كمان درته كل مايشوف خلقتي يا
ابني سيبك من الكمبيوتر ده ده مضيعة للوقت وكنت ساعتها في الامتياز
ومعنديش حاجة اعملها ولما روحت دورات قعد يتريق عليا
مش هتكلم على الماتشات وخنقته من صوت الكرة ولعنه للاهلي قبل الزمالك
على المنتخب هو بيكره الكورة والموسيقى الغربي جدا وبخاصة البوب والروك
والهارد ميتال منين يسمع الكاسيت ويقعد يتخانق معاي بيكره الموسيقى
الغربي جدا ولما يسمع ام كلثوم يعني معاها ليه التنقاض ده زمان كانوا
بيسمعو عبد الحليم ودلوقتي بنسمع عمرو دياب يعني شعورنا المفروض واضح
وكانوا بيكرهو التدخل في حياتهم وانا بحب يكونلي شخصية مستقلة وخاصة
جدا ومبحبش حد يجرح خصوصيتي حتى ولو ابويا
ده كان بيتريق عليا لما اتحديته في التقدم للكليات العسكرية وكانها غصب
عشان هو كان في الجيش اقوله جسمي مينفعش انا مش رياضي ونظري ضعيف
ومبعرفش اعيش في الحياة العسكرية يزعل مني ويقولي ديه الاكاديمية وعمك
العقيد سابقا ليه وسايط هناك روح ادم ورقك وملاكش دعوة يعني من الاخر لو
ممشيتش على في دماغه ابقى من الخارجين ولا جماعات بو مصعب الزرقاوي
المصيبة لما عرف انني هقدم في السفر للخارج اشتغل طبيب مقيم في جيزان
وفرح لما رفضت العقد وعرفت انه مش كويس وجيزان ديه قرب اليمن واخر نقطة
في السعودية
واتخنق لما روحت اسال على التقدم للمعهد السينما من وراه عشان ابقى
مخرج وده كان امل عمري مش اكون دكتور ببالطو ابيض اقطع في الناس واسيح
دمهم مش بالذمة المخرجين بيكسبوا اكتر
الصراحة دماغنا مختلفة خالص بس هو ابويا ولازم امشي اموري واكبر دماغي
والله انا مش مستني حد يوقف في صفي ولا يدافع عن اي مننا ولا حدي يوعظني
بحسن معاملة الاباء لاني عارف هو اد ايه تعب عشان اكبر وابقى راجل يفتخر
بيه بس بنتقد تصرفاته معايا وهو المفروض يعرف ان كل زمن وليه طريقته
وكل مرحلة بيمر بيها الواحد بيتغير مشاعره وده طبيعي ولو كانوا الاهالي
درست سيكولوجي تربية الابناء كان زمانا في مكانة اخرى ..... قولولي بقى
بتعملوا ايه مع ابهاتكم