تعرفى انك ممكن تعملى عقد واكسسوارات باستعمال المكرونة ؟
فى أشكال كتيرة ومختلفة من المكرونة موجودة فى السوق. هاتى أشكال المكرونة من الودع والأنابيب و قومى بتلوينها. واعملى العقد الفرعونى اللي البنت لابساه في الصورة
الخامات المطلوبة - شوية مكرونة على شكل ودع و أنابيب- ورق مقوى- ورق كربون- ورق شفاف- قلم رصاص- ألوان مائية وفلوماستر- فرشاة للتلوين- ورقة من جرنال- 3 أطوال ( 80 سم ) من الشريط المطاط وممكن استعمال السلك بداله .- مقص - مادة لاصقة- خرامة الطريقة :********
أولا قومى بنقل صورة النسر الفرعونى على الورق الشفاف واستعملى الكربون وقومى بطبع الرسم على الورق المقوى
بعد كده قومى بقص النسر 
استعملى الخرامة واعملى 3 خروم على حروف جناح النسر من فوق
حطى المكرونة على ورقة الجرنال و لونيها بألوان مختلفة وسيبيها تنشف
الزقى المكرونة الملونة فى أماكنها على الرسم زى ما هوواضح فى الصورة
اعقدى 3 خيوط مطاطة أو سلك بكل فتحة من الفتحات اللى قمتى بتخريمها على جناح النسر وقومى بلقط المكرونة داخل الخيط . بعد ما تخلصى من لقط المكرونة جوه الخيوط اعقديها مع بعض واعملى الناحية التانية بنفس الطريقة وخللى بالك انك بعد كده تلزقى المكرونة على الفتحات اللى قمت بخرمها واربطى الخيط بيها .
بعد كده ثبتى قفل على حروف العقد المعقودة مع بعض وبكده يبقى عندك عقد جميل تتمناه كل بنت
على فكرة انت ممكن تستعملي الخرز بدل المكرونة وتعملى أشكال مختلفة بدل النسر علشان يبقى عندك أشكال مختلفة من الاكسسوار.
أضف الى مفضلتك
ساحة النقاش