ازيكوا النهاردة !! يارب تكونوا بألف خير

النهاردة جبت لكم فكرة هتنفع البنات قوى ...

طبعا كلنا أو معظمنا بنستخدم الايشادو لعنينا وساعات كتير بنجيب العلب الصغيرة اللى فيها لون أو لونين على حسب احتياجنا .

 جبت النهاردة فكرة عشان نقدر نجمعهم فى مكان واحد ويبقى سهل علينا اننا نلاقيهم وميضيعوش .

الفكرة ببساطة هنعملها من علبة السى دى اللى مش محتاجينها .. عايزين تعرفوا ازاى تابعوا معايا الخطوات .

 الادوات اللى هنحتاجها :

مقص - قلم - مسطرة - قطر - حلقات معدنية ( من عند بتاع الستاير ) - صمغ أو مسدس شمع - صلصال - قص ولصق ملون - وطبعا علبة سى دى فاضية .

الطريقة : 

قصى ورق القص واللصق على حسب مقاس السى دى والأفضل يبقى طبقتين عشان يثبت ومتقعش الحاجة منه .

حطى البلاشر او الايشادو وحددى الشكل بالقلم على الورق اللى لصقناة .

قصى بالكتر الدواير اللى حددتيهم بس بحذر شديد .


وده شكل السى دى بعد القص .

الصقى الدوائر الحديدية فى الفراغات بالصمغ أو بالمسدس عشان تثبتى عليه علب الايشادو او البلاشر .

وده هيبقى شكله بعد ماخلصنا لصق .


الصقى بالصلصال ظهر علبة الايشادو عشان لما تخلص تعرفى تشيليه بسهولة وتغيريها بواحدة تانية .

وبعدين ثبتى العلب فوق الحلقات المعدنية .

وده شكل العلبة بعد ماخلصنا لصق كل علب الايشادو فى مكانها .

ممكن بقى تضيفى ورق كريشة ورق ملون أو ورق سوليفان ( فويل ) بدل القص واللصق زى ماتحبى .

وممكن تزينى العلبة من الخارج بأى شكل تحبية .

وده هيبقى شكلها النهائى

وبكده تضمنى ان مفيش حاجة تضيع منك تانى ..

ويارب الفكرة تعجبكوا ،،،