عاملين ايه النهاردة ؟!! يارب تكونوا بخير

كلنا طبعا عارفين الشمع ومفيش بيت بيقدر انه يستغنى عنه

النهارده جبت لكم طرق مختلفة لتصنيع أشكال متنوعة من الشمع و إن شاء الله هتعجبكوا

يلا بينا نبدأ

ده شكل الشمع العادى اللى كلنا عارفينة طبعا .

وده برضة الشمع العادى بس القالب مختلف

أول طريقة :

شمعة بقشر البيض 

الأدوات المطلوبة :

((  قدر صغير -  شموع - قشر بيض - عود أسنان - خرز أو ترتر أو اى حاجة تصلح للزينة ))

عشان نفرغ البيضة نعمل فيها فتحة مش كبيرة ونفرغها وبعدين نغسلها بالراحة ونخليها تجف .

ودى خطوات العمل :

نجيب القدر فيه الشمع بأى لون تحبية أو المتوافر عندك ونحطه على نار هادية مش عالية ... وخليها على النار لغاية الشمع كله ما يذوب ..

وبعدين صبية فى البيضة

وبعد ما تجف شوية حطى الفتيل وعلقية بعود للاذن او اى حاجة عشان ميقعش فى الشمع

بعد ما تجف قشرى البيضة

وده هيبقى شكل الشمع النهائى

لو حبيتى تزينيها ضيفى عليها خرز أو ترتر

وده هيبقى شكلها النهائى بعد التزيين

تانى طريقة :

شموع على شكل وردة

أصهرى الشمع بنفس الطريقة السابقة بس التغيير هيبقى فى القالب اللى هيكون صينية مسطحة بدل البيضة .

وقبل ماالشمع يجف قطعية بقطاعة مدورة زى الصورة

وبعد ماتجف خرجى الشمع من الصينية

وجهزى الفتيل وهيكون أطول من حجم الشمعة شوية

بعد كده ثبتى الفتيل على دايرة شمع

وأبدئى لفى الشمعة حول الفتيل

ولفى باقى الشمع حول الفتيل عشان تكونى شكل الوردة

وده هيكون شكل الشمعة من تحت  

بعد كده أصهريها شوية من تحت عشان الشمع يثبت فى بعضة والوردة تمسك فى بعضها .

وده هيكون شكل الشمعة النهائى

ودى شموع عائمة بنفس الطريقة بس الوردة أصغر

الطريقة الثالثة :

 شموع العسل

أصهرى الشمع بنفس الطريقة السابقة بس الفرق أن القالب بتاعها غلفناة من جوة بشمع العسل وغلفنا شمع العسل بفازلين عشان ياخد الشكل ده .

الطريقة الرابعة :

شمعة بشكل الإسفنــج من الخارج

هنستخدم فيها الثلج المكسر لقطع صغير،بعد صهر الشمع بالطريقة السابقة أدهنى القالب بزيت السليكون أو الفازلين ، ونبدأ بعملية الصب التدريجي للشمع ، ونضيف قطع الثلج الصغيرة داخل القالب، ونستمر بإضافة الشمع مع الثلج المبروش، وضعى القالب في إناء عشان يصفي المياة الناتجة عن إسالة الثلج .

وده هيبقى شكلها النهائى

 الطريقة الخامسة :

الشمع القطع

نفس طريقة صهر الشمع السابقة بس أستخدمنا شمع ملون وشمع أبيض وقطعنا الشمع الملون قطع من غير صهر وحطيناه فى القالب وبعد كده صبينا عليه الشمع الابيض المصهور.

وده شكلها النهائى

الطريقة السادسة :

الشمعة الملتوية

نفس طريقة صهر الشمع السابقة بس بعد ماصبينا الشمعة فى القالب وقبل ما تجف ضغطنا عليها وخليناها مسطحة وبعدين لويناها بايدينا .

وده شكلها النهائى

الطريقة السابعة :

شموع الرخام أو المرمر

 نفس طريقة صهر الشمع السابقة بس أستخدمنا شمع ملون وشمع أبيض ونصهر الشمع الملون ونصبه في قالب واحد ونتركه يبرد، ونقوم بعد ذلك بتقطيعها إلي قطع صغيرة، نقوم بصهر الشمع الأبيض، وفي وفى الوقت نفسه ندهن القالب بمادة السيلكون أو الفازلين عشان يعطى الشكل النهائي اللمعان والنعومة، وكمان بيساعد على عدم إلتصاق الشمع بالقالب.

وبعد كده نقوم بصب قليل من الشمع داخل القالب المدهون، لتثبيت شمعة رفيعة في منتصفه، تناسب مع طول القالب، ثم نقوم بصب الشمع الأبيض المصهور على مراحل، وفي نفس الوقت نقوم بإضافة قطع الشمع الملونه اللي قمنا بتحضيرها مسبقاً، بطريقة رشها وتوزيعها على الجوانب، وفي نفس الوقت نقوم بإضافة كميات من الشمع الأبيض المصهور على دفعات، لغاية لما يكتمل تعبئة القالب، وبنفس الطريقة المزدوجة من العمل، ويجب تغطية الشمعة التي ثبتناها في منتصف القالب،

وده هيبقى شكلها النهائى

الطريقة الثامنة : 

شموع الرمل

 نفس طريقة صهر الشمع السابقة بس التغيير كان فى شكل القالب اللى كان رمل وعملنا جواه حفرة وصبينا الشمع فى الحفر وبعد ما نشفت شكلها بقى كده .

وبنفس الطريقة ممكن تعملى اشكال تانية انا جربت اعمل شموع فى زجاجات البرفانات وشكلها كان جميل جدا غير ان كمان ريحتها كانت ريحة البرفان اللى كان فى الزجاجة وكمان جربت وعملتها فى اللمبة المحروقة بعد ما فرغتها من جوه واخدت شكل اللمبة وكان شكلها فعلا رائع .

جربوا ومش هتندموا

ويارب الافكار تعجبكوا ،،،