يعنى إيه بلوج ؟

البلوج أو المدونه هى ببساطه صفحه على النت , بيقوم بالكتابه فيها شخص أو أكتر من شخص , وبيكتب فيها موضوعات أو يوميات أو مواقف .. أو أى شىء يخطر على باله , ومع إنتشار مدونته على النت بيتابعها ناس كتير , وبيسيبو فيها تعليقات comments على الموضوعات الى بيكتبها الشخص دة , وبالتالى هو كمان بيزور مدونات الناس دى ويكتب تعليقاته على مدوناتهم ... ومع الوقت بتزيد شهرة مدونته , وبيدخل أكتر وأكتر فى العالم البلوجرى , لحد ما بيصبح التدوين جزء من يومه , ونشاط لا يمكن التوقف عنه إلا فى حالات نادرة جدا ...

إمتى بدأ التدوين ؟

محدش يعرف التدوين بدأ إمتى بالظبط , لكن نقدر نقول إنه ظهر من فترة مش طويله , وكان فى البدايه صعب ومعقد وبيحتاج تكاليف كبيرة لإنشاء مدونه , أما النهردة فا الموضوع أصبح سهل جدا , وتقدر فى خمس دقايق يكون عندك مدونه وتنضم لعالم المدونين الى بيزيد يوم بعد يوم , أما التدوين فى مصر , فا نقدر نقول إنه بدأ ينتشر فى منتصف سنه 2004

مين يقدر يدون ؟

أى حد !
أى حد عندة كمبيوتر وإتصال بالإنترنت يقدر يبدأ حالا فى كتابه أول تدويناته , ومش لازم يكتب عن موضوعات سياسيه , ومش لازم يكون ضليع فى اللغه العربيه , تقدر بسهوله تكتب عن أحداث يومك وأصحابك والمواقف الى بتقابلك فى الجامعه أو فى البيت , وتقدر تكتب باللغه العاميه أو الفصحى أو أى لغه تانيه , فى كل الأحوال هتلاقى ناس تتابع مواضيعك وتكتب لك تعليقات تشجعك وتناقشك فى الموضوعات الى بتكتبها , لإن مجتمع البلوجرز مجتمع مجتمع كبير جدا , ومتسع للناس من كل الجنسيات والمتحدثه بكل اللغات وفى كل المواضيع .. بس إنت إكتب وورينا إبداعك !

وأنا أدون ليه ؟! التدوين هيفيدنى فى إيه ؟

محدش يقدر يقول إجابه مباشرة على السؤال دة .. لكن التدوين غريزة فى كل إنسان ! وكل واحد بيكون سعيد جدا لما يحس إنه يقدر يشارك أفكارة وكتاباته وأحلامه وتطلعاته مع ناس من كل حته فى العالم .. المدون دايما بيكون شخص متفائل ومنفتح على العالم , وصعب جدا يجيله إكتئاب لإنه "بيفضفض" دايما مع ناس من كل مكان فى العالم ... كمان الإحتكاك بناس من ثقافات مختلفه بيخلى أفق المدون أوسع , وأكتر قدرة على تقبل الأخرين والنجاح فى حياته العمليه ... من الأخر : التدوين هيغير حياتك وهيخليك دايما فى تقدم للأفضل .

هل التدوين فيه خطر على سريه بياناتى على النت ؟

إطلاقا !

كل المواقع الى بتقدم لك خدمه إنشاء مدونه , بتتعهد بعدم مشاركه بياناتك مع أى جهه تالته , دة غير إنك ممكن تستخدم إسم مستعار فى كل موضوعاتك المكتوبه , وبياناتك الى بتسجل بيها على الموقع , ومن أول ما ظهر التدوين لحد دلوقتى مفيش أى حاله تسرب معلومات حصلت , لإن الشركات الى بتقدم الخدمات دى شركات كبيرة وعالميه وبتحترم سمعتها .. ويكفى إنك تعرف إن أكبر موقع للتدوين blogger مدعوم من جوجل google شخصيا !

أقدر أستعمل الوسائط المتعددة فى مدونتى ؟

بالتأكيد !

تقدر بسهوله تضيف أى صور أو ملفات فيديو أو ملفات نصيه لأى موضوع فى مدونتك , بحيث توصل فكرتك كامله لزوار مدونتك وبكل وسائل الشرح الحديثه .. وكل دة بأبسط الوسائل بعيد عن أى تعقيد ..


هل الوجود التدوينى المصرى والعربى قوى ؟

جدا !

كل يوم بتظهر مئات بل ألاف المدونات العربيه على المواقع المقدمه لخدمه المدونات , ويكفى إن نتيجه البحث فى جوجل google عن كلمه ( بلوج ) بالعربى أظهرت 304 ألف مدونه ! وكل يوم العدد بيزيد , والمدونات اللى باللغه العربيه بتتكلم وبتتناقش فى كل حاجه بحريه تامه , وإنت ليك دايما حريه التنقل بين المدونات , ومتابعه الى يعجبك منها ...

مين مشاهير المدونين المصريين ؟

كتير جدا .. مثلا الشاعر الكبير أحمد فؤاد نجم , والفنان خالد الصاوى , والكاتب الروائى د. علاء الأسوانى .. وغيرهم كتير , وعلى فكرة هتلاقى فى الملف دة موضوعات عن مدونات المشاهير دول ..