الفســــــــــــــاد
كلمة كلها قبح
انما احنا هنا هنتكلم عن الفساد من وجهة نظر مختلفة شوية
مش هنتكلم في السياسة يعني
احنا هنتكلم عن الفساد اللي أكبر وأخطر كتير من الفساد السياسي وده من وجهة نظري طبعا
الفساد اللي موجود في كل شرائح المجتمع بكل طبقاته
طبعا اللي درس إدارة مننا يعرف ان الهيكل الإداري بيكون أشبه بالهرم
ومقسم اللي عدة مستويات وكل مستوى يدير المستوى الأقل منه حتى رأس الهرم اللي هو أعلى منصب إداري
وطبعا كلنا بنحب مصر ونفسنا انها تكون أحسن بلد في الدنيا
وناس كتيرة فاهمة إن الإصلاح ده هيتم عن طريق تغير قمة الهرم الإداري ده
انا مختلف تماما مع وجهة النظر دي:no000000:
وانا مستقل يعني مش حزب وطني ولا أي حاجة انا بتكلم عن مجرد وجهة نظر خاصة بيا
وجهة نظري دي تكمن في ان الإصلاح لازم يبدأ من القاعدة العريضة من الهرم ثم المستوي الأعلى فالأعلى
احنا للأسف مش شايفين الفساد اللي موجود في الهرم كله
وكل اللي اهتمامنا منصب عليه هو الفساد اللي في المستويات الأعلى من الهرم
وده بيكون لعدة أسباب:
يمكن منها ان الضوء بيكون مسلط أكتر على المستويات دي
أو ان فساد المستويات الأعلى دي ممكن يكون بيأثر على المستويات الأدنى بشكل أو بآخر
انما انا شايف ان في فساد كبير أوي في المستويات الادني
يمكن لما حاولت أحصى المجالات دي
وجدت انها شبه لا نهائية
وهذكر لكم على سبيل المثال أوجه الفساد اللي انا شايفها في مجتمعنا:
فساد الموظفين في الحكومة واللي بيقضوا طول النهار نايمين في شغلهم او يقعدوا يتكلموا مع بعض او يقرأوا جرايد ومفيش أي حاجة من المهام المكلفين بيها بيتم عملها ويمكن لو في حد حولهم عايز يشتغل بيعطلوه ويشتتوه ويتريقوا عليه ولو جيت تسألهم ايه اللي بيتعملوه ده؟ يقولك: على أد فلوسهم وده طبعا مش مبرر لأنه قبل الشغل ده مقابل الأجر ده من الأول
وفساد الموظفين برضه في انهم يزوغوا من شغلهم واللي يروح بيته واللي يشتغل على تاكسي واللي يقعد في المحل بتاعه وبيروح الصبح يمضي حضور و آخر النهار انصراف وآخر الشهر ياخد مرتبه زي الباشا
وفساد الموظفين برضه بنشوفه في عدم اتمام المهام إلا اذا دفعت رشاوي وسياسة الدرج المفتوح
وفساد الأداريين في توزيع المكافآت والجزاءات واللي بيتحكم فيها الجانب الشخصي بشكل أكبر من جانب الكفاءة
ومش عايز حد يفهم اني عامل حملة على الموظفين انما احنا فعلا لازم نشوف الفساد ونحس بيه لأني من وجهة نظري هو ده أول طريق الأصلاح
ولسه الفساد ما خلصش:no000000:
الفساد في التلميذ اللي بيهرب من مدرسته ومش بيذاكر وبيطلع مش فاهم حاجة ولا نافع في أي حاجة
والفساد في المدرس اللي مش بيشرح في المدرسة عشان التلاميذ ياخدوا دروس عنده
والفساد في المدرس اللي أثناء الامتحانات يكتب الأجابات على السبورة عشان كله ينجح
والفساد في طالب الجامعة اللي مش بيحضر محاضراته ولا بيقرأ كتبه وبيعتمد على ملخصات ولا على البراشيم ولا على الغش وينجح وهو مش فاهم حاجة أصلا وينضم إلى صفوف عديمي الكفاءة العاطلين اللي مش فاهمين أي حاجة
والفساد في استاذ الجامعة اللي مش بيشرح بضمير ولا بيصحح بضمير و يزبط ولاد الدكاترة زمايله عشان يزبطوا ولاده ويتعينوا معيدين على الرغم من وجود من هو أكثر كفاءة منهم
والفساد في المعيدين اللي بيسربوا الامتحانات للطلبة اللي بتاخد عندهم عشان ينجحوا وهم مش فاهمين حاجة برضه
والفساد في الملاحظ والمراقب اللي بيسيب الطلبة تغش في الامتحانات ويقول: دول زي ولادي لما أسيبلهم ولادي هيلاقوا اللي يسيبلهم ويضيع حق اللي ذاكر وسهر طول السنة
والفساد في المقاول اللي بيسرق من المؤن ومواد البناء
والفساد في الطبيب اللي بيعمل عمليات غير مشروعة او بيسرق أعضاء من مرضاه او بيدي أدوية غالية عشان واخد عمولات على الرغم من تواجد البديل الأرخص والموازي لنفس الكفاءة
الفساد في اصحاب المحلات اللي بتنهي عندهم صلاحية البضائع ويغيروا الاستيكر عشان ما تترماش والناس تشتري وتاكل ويقولك دول فراعنة مش بيأثر فيهم حاجة الكلام ده للأجانب يا راجل لأنهم مش بيتحملوا الحاجات دي
والفساد في أصحاب البزارات الصغيرة اللي بتكون حول الآثار ويلحوا بملل على السياح عشان يشتروا منهم لدرجة تخلي السايح يكره البلد باللي فيها
الفساد في سواق التاكسي اللي بيفرض عليك أجرة أكثر من حقة بكتير ويا تدفع يا هتتبهدل
الفساد في الفنيين بكل أشكالهم سواء كهربائية أو سباكين او مكانيكية ...ألخ واللي بيعملوا شغلهم بقلة ذمة وضمير عشان تبوظ تاني وتجيبه تاني
الفساد في المزارع اللي بيرش هرمونات ومواد ضارة على المحاصيل بتاعته عشان يبقى شكلها أحسن او حجمها أكبر ويكسب أكتر ولما تتاكل تجيب أضرار كبيرة للي بياكلها
الفساد في عسكري المرور المرتشي وفي ضابط الشرطة المرتشي واللي المفروض انهم جهات تمنع الأخطاء ولكنهم
بيتغاضوا عن الأخطاء دي عشان الفلوس اللي بياخدوها
الفساد في رجال الأعمال اللي بياخدوا فلوس البنوك ويهربوا بيها لبره عشان يدمروا اقتصاد البلد
الفساد في المواطن اللي بيشتري حاجات مستوردة مالهاش اي لازمة ويضر بيها اقتصاد بلده برضه
الفساد في رجل الأعمال اللي بدل ما بيستثمر فلوسه دي في بلده ويشغل بيها شباب بلده وموارد بلده العطلانه يروح يستورد بيها حاجات من الصين ولا من اي حته تانية ويخلى ناس تانية هي اللي تستفيد
الفساد في كل واحد بيلوث نهر النيل بأي شكل من الأشكال
والفساد في كل مالك عربية مفوته بتلوث الهواء
والفساد في كل مواطن بيرمي مخلفاته في الشارع
والفساد في كل مدخن مش بيحاول انه يقلع عن العادة دي اللي بتستهلك موارده وصحته وصحة اللي حواليه
والفساد في موظف الجمارك ومفتش الجمارك واللي بيضيعوا حق الدولة مقابل الرشاوي او يسمحوا بدخول حاجات غير صالحة وتضر بالبلد والمواطنين
والفساد في الأجهزة الرقابية اللي المفروض انها تكون رقابة على الدولة ومستقلة عن الحكومة
واللي بقدرة قادر مسكها بعض الناس المجاملين واللي من كتر المجاملة أصدروا قرارات ان المجلس الرقابي ده يبقى تابع لمجلس الوزراء اللي المفروض انه يراقبه
يعني كأني عندي ابن كبير وابن صغير
وبقول للكبير انت اللي هتراقب الصغير وتمنعه عن الخطأ
يجي جاي الكبير يقول للصغير انا تحت أمرك وفلوسلي هاخدها منك واللي يعجبك اعمله ولا يهمك
وكل دي أشكال من الفساد ولكن في ملحوظة وهي انني لا أعمم ولكن هذه نسب كبيرة في مجتمعنا
احنا بشر وكلنا جوانا جانب الخير وجانب الشر
وجانب بيسعى للفساد وجانب بيسعى للأصلاح
وأهم هدف للدين والأخلاق هو تقويم السلوك ده
ولكن للأسف كتير مننا مفتقدين للمفهوم الحقيقي للأخلاق والدين
وواخدين الدين بظاهره وواخدين الأخلاق بظاهرها وهم من جوه زي المستنقع
مهما غيرت في قمة الهرم والهرم كله بايظ من تحت..... عمر الهرم ما هيتصلح
انما انا متأكد ان لو قاعدة الهرم اتصلحت..... تلقائيا المستوى الأعلى هيبقى أحسن ...والأعلى هيبقى أحسن
لأن الجيد يجلب الجيد
والسيء يجلب الأسوء
عمر الأصلاح ما هيجي من بره زي ما في قلة من أقباط المهجر معتقدين ان امريكا ولا اسرائيل هتيجي تخلينا جنة الله على الأرض
ولا هيجي من فوق زي ما في ناس كتيرة معتقدة
ولا هيجي من عضو مجلس الشعب اللي بيدفع ملايين عشان يدخل المجلس ويخدم الشعب المطحون يا حبة عيني وهو هدفه الحصانة ومميزات مجلس الشعب
احنا لو بصينا لدولة من الدول اللي نفسنا نبقى زيها
مش هنلاقي كم الفساد ده في هيكلها او الهرم بتاعها
على الرغم من ان الدول دي وثنية ومعندهاش الوازع الديني اللي المفروض انه يكون عندنا
الا انهم بيتقنوا شغلهم جدا جدا جدا
من اصغر عامل في الدولة الي رئيس الدولة
كله بيشتغل بضمير.....كأنه بيعمل الحاجة دي لنفسه
وتلاقي الطلبة مجتهدين والمدرسين مجتهدين
الناس كلها شعلة نشاط وتقدس العمل ده كأنه إله
وتحتقر الرشوة
وفي بلاد بتعتبر البقشيش...... وليس الرشوة اهانة كبيرة أوي في حقة ويطالبك باعتذار لأنه بيعمل واجبه وبياخد أجره عليه ومش منتظر منك حاجة لانه مش شحات
لو احنا عايزين نتصلح بجد
لازم نبدأ بنفسنا
الحكومة هتعمل ايه في الفساد اللي فوق ده كله
مش هنعين وراء كل موظف رقيب عليه يشوفه بيشتغل صح ولا لا
لازم الرقيب ده يكون من جوه وهو اللي بيوجه الواحد للصح والخطأ
انا عارف ان الموضوع جامد اوي وقاسي شوية
انما احنا لازم نفوق
لازم نبدأ بنفسنا وإلا هنفضل في انحدار مستمر لأسفل
وما دمنا على هذا الوضع فتوقعوا الأسوأ
ومش عايز حد يعتقد اني متشائم او نظرتي سودة للأوضاع
انما اللي انا قولته ده هو الواقع من وجهة نظري
انا فاتح الموضوع للمناقشة
وعايزكم كلكم تقولوا وجهات نظركم
وتقولوا أوجه تانية للفساد انتم شايفنها
وتقولوا نصلح ازاي عشان نبقى أحسن بلد في الدنيا كلها
وأعتذر على الإطالة
ويارب مايكونش مجهودنا هنا مجرد كلام بنقوله ومش بنطبق منه حاجة في واقعنا
وتقبلوا تحياتي<!-- / message --><!-- sig -->
ساحة النقاش