ليه كل شئ جميل فى حياتنا يخلص بسرعة و ليه كل ابتسامة فجأة تتقلب حزن و دموع ايام قليلة لكن كانت سعيده قضيناها فى السيرك لكنها شبه كل شئ حلو تنتهى بسرعه و يكون اخرها حزن و ألم و دموع و صدمة كبيرة جداً .
عيد ميلاد كابتن روما
انهارده كان يوم جميل ورائع كله سعادة و ابتسامه لانه انهارده كل السيرك قرر يفاجئ كابتن روما مفاجئة حلوة جداً أسعدت كابتن روما و الجمهور كمان
يوم 25 ابريل عيد ميلاد كابتن روما ولكن علشان عيد الميلاد يكون مفاجئة بجد قرر كل الفريق أنه يحتفل بعيد الميلاد قبلها بأيام ووقتها كابتن روما لا يمكن يتوقع انه يكون عيد ميلاده .
محمد إبن كابتن روما اشترى كل لوازم عيد الميلاد و كابتن مجدى رتب الزينة و شوقى جهز البالونات و ماريانا جهزت أغانى عيد الميلاد على الدي جى و لكن كان قمة الكوميديا فى الموقف الجاى ده !!!
كابتن روما أول دخوله للسيرك : يا ولاد التورته و الزينة علشان مين
كابتن مجدى : بعد إذنك يا كابتن فى واحد من الجمهور جابها علشان عيد ميلاد ابنه انهارده وقرر يفرح ابنه و يحتفل به هنا فى السيرك ممكن ؟
كابتن روما : أكيد و من غير ما تسأل يا كابتن مجدى طبعاً
كابتن مجدى : شكرا لزوقك و طيبتك يا كابتن روما طول عمرك قلبك كبير يا كبير .
و فجأة يتفاجئ كابتن روما بحضور العائلة للسيرك طبعا كابتن روما فرح جداً و استقبلهم و قالهم دى أحسن مفاجئة فى الدنيا طبعاً قالوا لكابتن روما انت وحشتنا جينا نشوفك .
بعد شوية أتفاجئ كابتن روما تانى أن كل أصدقائه حضرو للسيرك ، يفرح جداً و يرحب بيهم و معتقد أنها زياره ودية منهم ولكن محمد و مجدى مرتبين كل شئ ، ورا الستاره كابتن روما واقف مع اصدقائه فى منتهى السعادة انه كل الناس اللى بيحبهم اجمعوا فى يوم واحد .
و فى الفقرة قبل الأخيرة حصل حوار أجمل بين كابتن روما ومحمد
كابتن روما : محمد مش ملاحظ انه العرض قرب ينتهى واحنا انشغلنا مع اهلنا واصحابنا ونسينا عيد الميلاد الطفل الصغير و والده حيزعل كده .
كابتن محمد : لا ما يصحش طبعاً .... طول عمرك طيب وقلبك كبير يا بابا
كابتن روما : بابا فى البيت احنا فى الشغل اتفضل اخرج للجمهور وابدأ عيد الميلاد
كابتن مجدى : لا لا لا أستنى يا كابتن محمد ما يصحش ، اتفضل حضرتك يا كابتن روما انت الكبير
و يخرج كابتن روما للجمهور
كابتن روما : حقيقى أنهارده أنا اسعد الناس لان كل الناس اهلى واصحابى و احبابى اتجمعوا انهارده فى يوم واحد و يسعدنى كمان أنى احتفل معاكم بعيد ميلاد .... و لكن يكتشف كابتن روما انه ما يعرفش اسم الطفل فيسأل كابتن محمد بهدؤ هو أسم الطفل ايه يا محمد ؟
كابتن محمد : روما اسمه روما يا بابا
و فجأة يغنى كل الموجودين و الجمهور لكابتن روما و يكتشف انه هو نفسه صاحب عيد الميلاد فعلا كان شعور جميل ورائع انه فنان يحتفل بعيد ميلاده وسط جمهوره
أنذار بالإخلاء
يوم جميل و لكن دائما تأتى الرياح بما لا تشتهى السفن فجأة خرج كابتن مجدى يستلم جواب و وقف حزين ورا الستارة و هو بيقراه ، خرجت أسأل عن الجواب ... للاسف جواب إنذار بإخلاء السيرك خلال يومين لوجود قضية مرفوعة ضد السيرك من عدد من الشخصيات الهامة شئ مؤسف و محزن
أجمل لحظات السعادة تنتهى بحزن و ألم و أجمل الايام تمر بسرعة و كأنها حلم جميل .
انتهى عيد الميلاد و دخل كابتن روما ورا الستارة استعداد لأخر فقرة فقرة الوحوش ولكنه شاف كابتن مجدى حزين ومعاه الانذار ، كابتن روما اخد الانذار وقراه و فكر دقيقة و لكن كان تصرفه رائع جدا
مسك كابتن روما المايك ورا الستاره وقال "جمهورى الحبيب عيد ميلادى كان مفاجئة ليا لان أولادى قررو يحتفلوا به معاكم فى أخر يوم لينا فى السيرك وسط أجمل جمهور لانه انهارده أخر يوم و أخر عرض شكرا ليكم "
و انتهى أخر يوم أسعد يوم و أصعب يوم و فيه مراره و الم وحيرة ليه بعد كل الروعة دى اتوقف السيرك ؟؟؟
