" شكلك فاهم يا نصه " جملة شهيرة من فيلم (غبى منه فيه ) فى موقف جمع بين أثنين هما سلطان غبى و شكله بيقول أنه غبى و صديق له اسمه نصه غبى ولكن شكله بيقول انه فاهم و مش غبى علشان كده كان دايما صديقه يقوله شكلك فاهم يا نصه ولكن الواقع مع الاسف أنه غبى مش فاهم حاجة خالص ....
هنا فى السيرك ما فيش أى مجال للغباء من إنسان أو من حيوان و ده اثبته الكلب كنزو بموقف يدل أنه الحيوان عنده ذكاء اجتماعى وقدره عجيبه على التواصل البصرى .
أول يوم دخلت فيه ورا الستاره كان أول لقاء ليا مع كنزو وكان فى القفص وقتها كنت واقفه مع كابتن مجدى وأول ما شافنى كنزو بدأ ينبح بصوت عالى جداً و الأغرب أنه حاول يفتح باب القفص الحديد بأسنانه و لكن كابتن مجدى حاول يسكته و بعدها قاله بصوت عالى بس خلاص فأتصرف كنزو تصرف غريب جداً انه بدأ يدب بأحد رجليه الأمامية فى الأرض و كأنه طفل بيدب فى الارض اعتراض على أمر والده .
مع تكرار الزيارات إعتاد كنزو على وجودى و مبقاش ينفعل ولكن إنهارده لما دخلت السيرك قبل العرض فوجئت انه زوج وزوجته من الجمهور دخلوا ورايا ورا الستاره ووقتها كنزو لأنه لاماح بدأ ينبح بصوت عالى و كأنه بيقولهم إمشوا من هنا و لكن اندهشت من تصرف غريب اتصرفه كنزو بعد ما نبح بدأ يركز فى عنيا وكأنه بيسألنى الناس دى معاكى نظرة كنزو كانت مفهومه جدا فبدأ ينبح عليهم ويعيد نفس النظره و كأنه بقولى لو هما معاكى اهلا بيهم و لو اغراب ايه جابهم هنا و هنا الزوج وزوجته نظرو ليا ولكنزو و كأنهم فهموه وشعرو بالاحراج وخرجوا .
كنزو ماذا تفعل لو كنت مكانى ؟
تعرف يا كنزو انك فعلا رغم إنك كلب وحيوان لكنك فعلا عندك قدره على التواصل البصرى وعندك ذكاء اجتماعى و تعرف إزاى تحترم أصدقائك و تحترم كمان أصدقاء أصدقائك و عندك استعداد تحمى صاحبك حتى الموت و إن كان الوفاء طبعك يا صديقى انت أدهشتنى بذكائك و قدرتك على التواصل البصرى و لكن مع الأسف يا كنزو فيه ناس بشر مكتملى العقل و الحواس نتواصل معاهم سمعي و بصرى ولفظى و حركى و تحكى و تشرح دهر و فى الاخر تكتشف صاحبنا بيكلم معاك فى شئ تانى خالص بعيد عن أصل الموضوع تضطر تقول " شكلك فاهم يا نصه ".
تخيل انه فى عالم البشر ممكن الصديق يخسر صديقه لأنه أساء فهمه و بعد ما تتكلم مع اصدقائك و المفروض انهم الأقرب ليك تكتشف أنهم بعد كل ده مش فاهمينك وتلاقى نفسك تايه و بتقول ...هما عايزين ايه ؟ مين دول اساساً ؟ أصحابى دول و لا مين ؟ من أنتــــــــم ؟
تخيل انه فى عالم البشر ممكن نقاش او حوار بسيط يقلب بخلاف و نزاع و شارع يتقفل و دماء تسيل بسبب سؤ الفهم والاندفاع .
تخيل انه فى عالم البشر التعليم اتدهور لأنه الطالب ما عندوش إستعداد يفهم أو يتعلم و كمان أغلب المدرسين خلاص ما عندهمش إستعداد يعلموا و التعليم أصبح تجارة و تلخيص و حفظ و لغينا الفهم و العقل .
تخيل انه مش بس العامة لا ده النخبة كمان جرب تسمع برنامج توك شو يجمع أحسن نخبه فى البلد و بعد أول خمس دقايق الحوار يقلب خناقه وتلاقى كله بيكلم فى وقت واحد وأنت مش سامع و لا فاهم منهم حاجة لدرجة انك تبطل تشوف التوك شو علشان تحاول تحافظ على معلوماتك و فهمك لأنك اكيد هتخرج ناسى معلومات و مش فاهم و متلخبط و بتقول مين الناس دى ؟ و عايزين مننا ايه ؟ أنا مين أساساً ؟
تخيل كل كلامى ده نبذه صغيره جدا من كلام كثير و حزن كبير جوايا وانه ممكن اقولك تخيل من هنا لسنة قدام
اه يا كنزو لو تحط نفسك مكانى و مكان ناس كثير تصدق يا صديقى احنا حالنا للأسف أصبح يصعب على الكلب الأعور الحزين مع كامل تقديرى واحترامى يا صديقى لكل عالم الكلاب
و لكن فوجئت برد كنزو كان رد غريب لما قال " ماحدش يقولى حط نفسك مكانى انا حاطط نفسى مكان نفسى بالعافيه " معاك حق يا كنزو خليك كده علشان ما تتعبش
